Qyzylordadaǵy atyshýly oqıǵa: 9 sottalýshy kassatsııalyq sotqa shaǵym túsirdi

ASTANA. KAZINFORM – Qyzylordada 16 jastaǵy qyzdy seksýaldyq quldyqta ustaǵan 9 sottalýshy kassatsııalyq sotqa shaǵymdandy. Bul týraly qylmystyq ister jónindegi kassatsııalyq sottyń koll-ortalyǵy rastady. 

– Sottalýshylardyń kassatsııalyq shaǵymy boıynsha sot tyńdaýy búgin, ıaǵnı 12 qarasha kúni saǵat 15:00-de ótedi. Sot otyrysy jábirlenýshiniń múddesin qorǵaý maqsatynda jabyq rejımde ótkiziledi, - dedi kassatsııalyq sottyń koll-ortalyǵy.

Aıta keteıik, atalǵan is boıysha apellıatsııalyq sot otyrysy bıyl 27 mamyrda ótken bolatyn. 

Eske salsaq, 2024 jyldyń aqpanynan bastap úıine kelmeı ketken 16 jastaǵy qyzdyń oqıǵasy qoǵamdy dúrliktirdi. Otbasynyń jalǵyz balasy bolǵan qyzdy synyptastary men basqa da adamdar jezókshelikke májbúrlep, uzaq ýaqyt quldyqta ustaǵany anyqtalǵan. 

Ata-anasy polıtsııaǵa birneshe ret habarlasqanymen, quzyrly organ qyzdy izdeýdiń ornyna «ata-ana quqyǵynan aıyramyz» dep qorqytqan. Amaly taýsylǵan ata-ana qyzyn ózderi izdegen. Qyz birde «kafede daıashymyn», birde «gúl satamyn» dep aldaǵan. Ata-anasy barǵan jerde qyz bolmaı shyqqan. Keıin belgili bolǵandaı, ony ustaýshylar ata-anasynyń shý shyǵarmaýy úshin osylaı istetken.

Sonymen qatar QR ІІM Tergeý departamenti is Qylmystyq kodekstiń 134-baby 3-bóligi (kámeletke tolmaǵandardy jezókshelikke tartý) boıynsha tergelip jatqanyn rastaǵan edi. 

Qyzylorda qalalyq qylmystyq ister jónindegi soty 9 adamǵa úkim shyǵardy. Іs tolyq jabyq rejımde qaraldy.  

Sot materıaldaryna sáıkes, oqıǵa ornyn qaraý hattamalary, beınejazbalar, WhatsApp chattary, banktik tranzaktsııalar, sot-medıtsınalyq jáne psıhologııalyq saraptamalar, sondaı-aq jábirlenýshiniń egjeı-tegjeıli jaýaby arqyly tolyq rastaldy. 

Sonymen qatar oqıǵa saldarynan Qyzylordadaǵy № 7 mektep-lıtseıdiń dırektory, tárbıe jónindegi orynbasary, psıhologi, áleýmettik pedagogi jáne eki synyp jetekshisi qyzmetinen bosatyldy.