Qyzylordadaǵy áleýmettik dúkender nege durys jumys istemeıdi
QYZYLORDA. KAZINFORM — Qyzylorda oblysyndaǵy áleýmettik dúkenderdiń jumysyna jáne sóredegi ónim sapasyna qatysty syn jıiledi. Kazinform tilshisi osy másele boıynsha áleýmettik mańyzy bar azyq-túlik baǵasyn turaqtandyrýǵa bekitilgen «Baıqońyr» ÁKK aktsıonerlik qoǵamyna resmı saýalmen júgindi.
Korporatsııa basshylyǵy málimdegendeı, áleýmettik dúkenderde baǵa ózge saýda oryndarymen salystyrǵanda tómen. Qoljetimdi azyq-túlik tizimi, onyń jetkizilýi jóninde aktsıonerlik qoǵamnyń Facebook áleýmettik jelisindegi paraqshasynda turaqty túrde jarııalanyp otyr.
— Qyzylorda qalasynyń aýmaǵynda barlyǵy 37 áleýmettik dúken bar. Sonyń 6-y qazirgi ýaqytta ýaqytsha jabyq. Óıtkeni dúkendi óteýsiz paıdalanýshy kásipkerlerdiń aktsıonerlik qoǵamǵa qaryzy shoǵyrlanyp, ony óteı almaǵan, ıaǵnı kásibin júrgize almaǵan. Jumysy ýaqytsha toqtaǵan áleýmettik dúkender ótinish bildirgen kásipkerlik sýbektilerine óteýsiz (jaldaý qunynsyz) paıdalanýǵa beriledi, — delingen habarlamada.
Korporatsııa basshylyǵy áleýmettik dúkenderge turaqtandyrý qorynan áleýmettik mańyzy bar azyq-túlik taýarlary kúndelikti tolyq kólemde jetkiziletinin atap ótti. Al keıde sórelerdiń tez bosap qalý sebebin dúken ornalasqan aýmaqta halyqtyń kóp shoǵyrlanýymen, dúkendi óteýsiz paıdalanýshylardyń suranysymen baılanystyrdy.
— Degenmen, taýar taýsylǵan ýaqytta kásipkerdiń tapsyrysymen qajetti azyq-túlik qory kúndelikti tolyqtyrylyp tur. Ónim qoımadan taza kúıinde tasymaldanady. Satýshylar paketterge qaıtadan iriktep salyp, jaramsyz, shirigeni kezdesken jaǵdaıda qoımaǵa qaıtarady. Ónim tutynýshynyń tańdaýyna qaraı beriledi. Áleýmettik dúkender men áleýmettik buryshtardyń jumysy aktsıonerlik qoǵam qyzmetkerleriniń kúndelikti baqylaýynda. Tıisti memlekettik organdar da tekserip turady. Azyq-túlik saqtaý kezinde óz salmaǵyn joǵaltady (15%-ǵa deıin). Ol úshin zańdy normatıvter belgilengen. Qoımadaǵy taýarlar bul baǵyt boıynsha taldanyp, aı saıyn saraptamadan ótkiziledi, — delingen korporatsııanyń resmı jaýabynda.
Búginde turaqtandyrý qorynyń qoımasynda 2376,6 tonna, jetkizýshilerde 9512,1 tonna qor bar. Olar «Baıqońyr» ÁKK» AQ-na qarasty 37 áleýmettik dúkende (onyń 2-i et satýǵa arnalǵan) jáne oblys ortalyǵyndaǵy iri saýda úıiniń áleýmettik buryshtarynda, aýdandarda belgilengen operatorlar arqyly jáne ár aptanyń senbi kúni uıymdastyrylatyn jármeńkelerde belgilengen baǵada halyqqa usynylyp keledi.
Al jýyrda biz azyq-túlik baǵasy qymbattap jatqan tusta Atyraýda turaqtandyrý qorynyń ónimderi satylatyn birqatar dúken jabylyp qalǵanyn jazdyq.
