Qyzylordadaǵy AITV-ınfektsııasynyń oqıǵasy: Donorlardyń zertteý nátıjesi teris boldy

QYZYLORDA. KAZINFORM - Qyzylorda qalasynda perzenthanada qan quıylǵan áıelden kezekti tekserý kezinde anyqtalǵan AITV-ınfektsııasyna qatysty oblystyq densaýlyq saqtaý basqarmasy túsinikteme berdi.

Basqarma barlyq qan quıylǵan naýqas mindetti túrde AITV-ınfektsııasyna tekseriletinin atap ótti. Perzenthanada qan quıylǵan bosanǵan áıeldi kezekti tekserý kezinde AITV-ınfektsııasyna oń nátıje anyqtaldy. 

- Epıdemıologııalyq tergeý barysynda barlyq donorlarda qan quıý kezinde AITV-ǵa zertteý nátıjesi teris bolǵandyǵy belgili boldy. Bosanǵan áıel JITS ortalyǵynda esepke alyndy. Oǵan qajetti medıtsınalyq kómek kórsetilýde. Búgingi kúni balany AITV-ǵa tekserý teris nátıje berdi. Infektsııanyń bolýy nemese bolmaýy 1,5 jasqa tolǵanda anyqtalady. Qazir zerdeleý jumystary, donorlardy qaıta tekserý júrgizilýde. Zerdeleý jumystarynyń qorytyndysymen Basqarma tarapynan aqparat qosymsha joldanady, - dep málim etti Qyzylorda oblystyq densaýlyq saqtaý basqarmasynan.

Buǵan baılanysty Qyzylorda oblystyq Polıtsııa departamenti qylmystyq is qozǵalǵanyn atap ótti.

- Atalǵan derek boıynsha QR Qylmystyq kodeksiniń 317-babynyń 5-bóligimen qylmystyq is tirkelip, tergep-tekserý júrgizilýde. Qazaqstan Respýblıkasynyń Qylmystyq-protsestik kodeksiniń 201-babynyń talabyna sáıkes, qylmystyq is júrgizý barysy tergeý qupııalyǵyna baılanysty jarııalanbaıtynyn habarlaımyz, - dep málim etti departamentten.

Eske salsaq, budan buryn Qyzylorda oblysynda alǵash ret baýyrǵa transplantatsııa jasaldy.