Qyzylordadaǵy Abaı mektebiniń búkil oqýshysy aqyn óleńin jatqa biledi
QYZYLORDA. KAZINFORM — Qyzylorda qalasyndaǵy daryndy balalarǵa arnalǵan mamandandyrylǵan synyptary bar mektep aqyn Abaı Qunanbaıulynyń esimin ıelengen. Munda úsh tilde oqytý júıesi jolǵa qoıylǵan.
Taǵy bir ereksheligi, 4,5 myńǵa jýyq oqýshysy túgel aqyn shyǵarmashylyǵymen jaqsy tanys. Óleńderi men qara sózderin jatqa aıtady.
Kazinform tilshisi aqynnyń 180 jyldyq mereıtoıy qarsańynda sóz qadirin túsinetin mektep ujymymen jolyǵyp, balalardyń qabiletin baıqap kórdi.
Buryn «Murager» atalǵan irgeli bilim oshaǵy 2020 jyly respýblıkadaǵy Abaı jelililik mektepter quramyna endi.
— Mektebimizde Abaı shyǵarmalaryn tereńdetip oqytatyn gýmanıtarlyq synyptar ashyldy. Osyǵan deıin kóptegen fakýltatıvti, onlaın sabaq uıymdastyryldy. Ótken jyly 1-11 synyp oqýshylary men jalpy ujymdy oqytý baǵytynda jospar quryldy. Jospar aıasynda ártúrli is-sharalar, onyń ishinde toqsanyna bir ret Abaı shyǵarmashylyǵyna arnalǵan saıystar ótip turady. Bıyl Abaı óleńderin jatqa oqýdan 9 synyp oqýshysy Nazym Bólekbaı qalalyq deńgeıde 1-orynǵa ıe boldy, — deıdi qazaq tili men ádebıeti pániniń muǵalimi Lázzat Ómirzaqova.
Mektepte kórnekti aqyn shyǵarmashylyǵy keńinen nasıhattalady. Birinshi synyp oqýshysynyń ózi Abaıdyń keminde bir-eki óleńin qaǵazǵa qaramaı naqyshyna keltirip aıtady.
Sonyń biri — keshe ǵana mektep tabaldyryǵyn attaǵan Erkenaz Bólekbaı. Búldirshin bizge «Ǵylym tappaı maqtanba» atty óleńdi bastan-aıaq mánerlep oqyp berdi.
Sýdyratyp oqyp qoımaı, ár sózdiń tereńine úńiletinin, aqyn jyrǵa qosqan bes nárseden qashyq, bes nársege asyq bolatynyn jetkizdi.
10-synyp oqýshysy Dıdar Shýaqbaev ta — sóz qadirin jete uǵynatyn daryndy balalardyń biri.
— Aqyn óleńderin sanamyzǵa toqyp, ómirde qoldanýǵa tyrysamyz. Ol bizge ómirden óz ornymyzdy tabýǵa kómektesedi. Oqýshylar Abaı óleńderin tilmen emes, júrekpen aıtyp, qulaqpen emes, júrekpen tyńdap, júrgen jerinde dáripteýge kúsh salady. Abaı atamyzdy qurmetteý — kúlli qazaqty qurmetteý dep bilemin, — dedi ol.
Oqý ordasynda sóz zergeriniń 100-150 óleńine deıin jadynda saırap turǵan shákirtter az emes. Sonyń biri — 11-synyp oqýshysy Baǵdáýlet Táýekeluly.
— Meniń qorymda 100-ge jýyq óleń bar. Mektebimizde Abaı Qunanbaıulynyń shyǵarmashylyǵyna arnalǵan is-sharalar, onyń ishinde teatrlandyrylǵan qoıylymdar, mánerlep oqý baıqaýlary jıi ótip turady. Osyǵan deıin halyqaralyq konferentsııa aıasynda teatrlandyrylǵan kórinis qoıylyp, onda men Qunanbaıdyń rolin somdadym. Respýlıkalyq baıqaýda 2-oryn ıelendim. Biz árdaıym álem tanyǵan Abaıdy maqtan tutamyz, — dedi ol.
5-synyp oqýshysy Altynbek Nuralı hakim Abaıdyń 20-ǵa jýyq óleńin jatqa biledi.
— Ustazym Aqbaıan Islamqyzy bizge kóp nárse úıretti. Sol kisiniń jetekshiligimen mektepishilik jarystarǵa qatysyp, top jaryp júrmin. Aqynnyń ár óleńin júrekpen uǵýǵa tyrysamyn. Men onyń esimi qazaq barda máńgilik jańǵyratynyna senemin, — dedi oqýshy.
Balalardyń osylaı birinen biri ozyp turǵany ustazdar eńbeginiń arqasy ekenin topshylaý qıyn emes.
Qazaq tili men ádebıeti pániniń muǵalimi Aızat Qalybaıqyzy ózi de mektepte oqyp júrgeninde Abaıdyń 180 óleńin jattap alǵan. Talaı jyr dodasynda tuǵyr bıiginen kórindi.
Mektepte eńbek etip kele jatqanyna bıyl jetinshi jyl. Onysy ómir jolynda rýhanı azyq, shákirt tárbıeleýde baǵdarsham bola bildi.
— Abaı shyǵarmashylyǵyn ózim sabaq beretin synyp oqýshylaryna únemi nasıhattaımyn. Abaıdy qaıtalap oqyǵan saıyn ony jańa qyrynan tanısyń. Mádenıetińdi, bilimiń men bolmysyńdy jetildirgiń kelse, Abaıdy oqýdan jalyqpaý kerek. Aqynnyń ár óleńi, qara sózi men aýdarmasynan ónege alýǵa bolady.
«Bazarǵa, qarap tursam, árkim barar,
Іzdegeni ne bolsa, sol tabylar.
Bireý astyq alady, bireý — marjan,
Árkimge birdeı nárse bermes bazar» degen tórt shýmaǵynyń ózinde fılosofııa tunyp tur. Oqýshylar kóbine muny týra maǵynasynda túsinedi. Negizi bul jerde «bazar» dep halyqty, ómirdi meńzegen, ıaǵnı oqýdan, izdenýden jalyqpaǵan adam ómirdiń bazarynan ózine keregin alady, — dedi muǵalim.
Mektepte Abaı shyǵarmalaryn mánerlep oqytý úıirmesi jumys isteıdi. Jetekshisi Sandýǵash Ibrasheva aqynnyń rýhanı murasyn jańǵyrtý jalǵyz mereıtoımen shektelip qalmaıtynyn, úzilissiz jalǵasatynyn atap ótti.
Buǵan deıin biz Kerekýde «Abaı murasy — máńgilik baǵdar» atty erekshe aýdıojınaq jobasy jaryq kórgenin habarlaǵan edik.