Qyzylordadaǵy № 4 emhana ǵımaraty qashan jańarady
QYZYLORDA. KAZINFORM — Qyzylorda qalasy Tasbóget kentiniń turǵyndary kenttegi № 4 qalalyq emhananyń tozyǵy jetkenin kópten beri aıtyp júr.
Gúlsánim Aýkenova Tasbóget kentine qarasty Sabalaq saıajaıynda turady. Basy aýyryp, baltyry syzdaǵanda osy emdeý uıymyna qaralyp, em qabyldaıdy. Onyń aıtýynsha, turǵyndardy ǵımarattyń standartqa saı kelmeıtini jáne dárigerlerdiń jetispeýshiligi mazalaıdy.
— Bul — tozyǵy jetken burynǵy poshta ǵımaraty. Jańa ǵımarat salý týraly usynys talaı jyl buryn kóterilgen. Biraq áli seń qozǵalǵan joq. Muny endi emhana basshylyǵynyń kinási deı almaımyz. Medıtsına qyzmetkerleri halyqqa qal-qadirinshe qyzmet kórsetip keledi, — dedi ol.
Halyq sany 30 myńnan asatyn eldi meken úshin talapqa saı densaýlyq saqtaý nysany aýadaı qajet. Qala ákimdiginiń málimetine súıensek, emhana aýmaqtyq memlekettik múlik jáne jekeshelendirý komıtetiniń 2001 jylǵy buıryǵy negizinde buryn baılanys ortalyǵy bolǵan ǵımaratta ornalasqan. Ol kezde turǵyndar sany 21 myńnyń shamasynda eken. Emhana aýsymyna 350 adam qabyldaýǵa arnalsa, búginde kúndelikti 400 naýqas qabyldaıdy. Ǵımarat negizinen 1984 jyly poshtalyq qyzmet kórsetýge arnap salynǵan. Dálizderi men kabınetteri óte tar. 2006 jyly kúrdeli jóndeýden ótkizilgenimen qurylys normalary men talaptaryna sáıkes kelmeıdi, ıaǵnı tıptik emes.
Osyǵan baılanysty biz oblystyq densaýlyq saqtaý basqarmasyna suraý salǵanbyz.
— № 4 emhanany senimgerlik basqarýǵa berý múmkindigi qarastyrylyp jatyr. Eger senimgerlik basqarýǵa berilse, jańadan ǵımarat alýy múmkin. Olaı bolmaǵan jaǵdaıda da basqa densaýlyq saqtaý nysandary sııaqty bul emhananyń da máselesi sheshiledi, — dedi basqarma basshysynyń orynbasary Jańyl Ábýbákirova.
Ol aımaqtaǵy apatty jaǵdaıdaǵy nysandar túgel derlik jańalanǵanyn, tıptik emes mundaı nysandarǵa qatysty másele basqarma basshylyǵynyń qaperinde ekenin atap ótti.
Buǵan deıin biz Qyzylorda oblysynda apatty jaǵdaıdaǵy jáne tozyǵy jetken ǵımarattardy jańartý jumysy qarqyndy túrde júrgizilip jatqanyn jazǵan edik.