Qyzylordada júrgizýshi kýáligi joq adamdar balabaqsha kóligin júrgizgen

QYZYLORDA. KAZINFORM – 11–13 tamyz aralyǵynda Qyzylorda qalasynyń aýmaǵynda jol-kólik oqıǵalarynyń aldyn alý maqsatynda «Balabaqsha» jedel profılaktıkalyq is-sharasy ótti.

Oblystyq polıtsııa departamentiniń baspasóz qyzmeti málimdegendeı, is-shara barysynda 305 quqyq buzý deregi tirkeldi. 

– Onyń ishinde mindetti saqtandyrý týraly zańnama talabyn buzýdyń 26, jolaýshylar tasymaldaý qaǵıdalaryn buzýdyń 62 deregi anyqtaldy. 30 kólik mindetti tehnıkalyq qarap-tekserýden ótpegen bolsa, 132 jaǵdaıda artyq jolaýshy nemese balalardy ustaý qurylǵysynsyz alyp júrgen. 14 adam kólik quralyn basqarý quqyǵy joq bola tura, al 1 adam kólik basqarý quqyǵynan aıyrylǵanyna qaramastan temir tulpar tizgindegen. Zań talabyn buzǵandarǵa qatysty ákimshilik hattamalar rásimdelip, 28 kólik aıyppul turaǵyna jiberildi, 23 memlekettik belgi tárkilendi, - delingen habarlamada. 

11 tamyz kúni Shıeli aýdanynda polıtsııa qyzmetkerleri baǵdarshamnyń qyzyl túsine ótip ketken avtokólikti toqtatyp teksergende ishinde balalar bar bolyp shyqty. Avtokólik balabaqshaǵa tıesili eken, al búldirshinder sonymen balabaqshaǵa bara jatqan.

Aıta keteıik, oblysta qazirgi kúni 464 jeke balabaqsha bar, sońǵy kezde ondaǵy qyzmet sapasyna qatysty shaǵym kóbeıdi.