Qyzylordada JRVI juqtyrǵandar kóbeıdi: dúrligýge negiz bar ma?
QYZYLORDA. KAZINFORM – Qyzylordada epıdemıologııalyq maýsym bastalǵan 1 qazannan beri jedel respıratorly vırýsty ınfektsııanyń (JRVI) 16 786 jaǵdaıy tirkeldi. Bul ótken jyldyń osy kezeńimen shamalas.
Oblystyq densaýlyq saqtaý basqarmasynyń málimetine súıensek, naýqastardyń 63,1%-y – balalar. Aýrýǵa shaldyqqandardyń 5 %-y aýrýhanaǵa jatqyzylǵan. Halyqty statıstıkadan buryn aýrýdyń sıpatyn ózgertkeni qatty alańdatyp otyr.
- A tıpti (H3N2) tumaý nemese Gonkong tumaýy — jańa vırýs emes, maýsymdyq tumaýdyń jyl saıyn qaıtalanatyn ári burynnan belgili túri. Degenmen, ol halyqtyń álsiz toptary úshin qaýipti. Adamdar arasynda tez taralýymen, aýrýdyń aýyr aǵymda ótýimen erekshelenedi. Bastapqy medıtsınalyq-sanıtarııalyq kómek kórsetý uıymdarynda 124 súzgi kabıneti, ishek ınfektsııasynyń aldyn alý úshin 52 POR kabıneti, bilim berý uıymdarynda termometrııa, JRVI belgileri bar oqýshylardy oqshaýlaý qolǵa alyndy. Emhanalardaǵy mobıldi brıgada qyzmeti túngi saǵat 12-ge deıin uzartylyp, jedel medıtsınalyq járdem brıgadalarynyń sany 75-ten 81-ge kóbeıdi. 200 tósekke arnalǵan qaıta jańǵyrtýdan ótken oblystyq juqpaly aýrýlar aýrýhanasy qosymsha 100 tósek-orynǵa keńeıtildi. Al kópbeıindi oblystyq balalar aýrýhanasynda josparly emge qabyldaıtyn bólimsheler jumysy ýaqytsha toqtatylyp, pýlmonologııa bólimshesi 80 tósekke ulǵaıdy. Qajetti qorǵanysh quraldary men dárilik preparattar qory jetkilikti, - dedi basqarma basshysynyń orynbasary Maıa Myrzanova.
Epıdmaýsymda jedel járdem telefonyna tynym joq. Oblystyq jedel járdem stansasy bas dárigeriniń orynbasary Ǵalııa Nurseıitovanyń aıtýynsha, 10 qarasha kúni 103 jelisine 2591 qońyraý túsken, sonyń 55,2%-y «bala aýyryp qaldy» dep qońyraý shalǵan. 439 naýqas aýrýhanaǵa jetkizilse, sonyń 60%-y jatyp em ala bastady. Mamandar osy oraıda halyqty dúrbeleńge túspeýge, gıgıenalyq talaptardy qatań saqtap, dáriger keńesin oryndaýǵa, aýrýdyń alǵashqy belgileri baıqalǵan jaǵdaıda ýaqytyly medıtsınalyq kómekke júginýge shaqyrdy.
Oblystyq juqpaly aýrýlar aýrýhanasynda osy kúni emdelip jatqandardyń 66,8%-y — JRVI juqtyrǵandar. Júktemeniń kóbeıýinen qabyldaý bóliminiń ózinde 3 brıgada táýlik boıy jumys isteýge kóshti.
- Vırýsqa qarsy oseltamıvır qory, kapsýla, birrettik medıtsınalyq maska, sımptomatıkalyq, dezıntoksıkatsııalyq, antıbakterıaldy dárilik preparattar qory jetkilikti,- dedi aýrýhana bas dárigeriniń orynbasary Sharıpa Álıeva.
Buǵan deıin biz jańa epıdmaýsymda jalpy oblys turǵyndarynyń 9,9%-y ımmýndaýdan ótkenin jazǵanbyz.