Qyzylordada jol sapasyn tekserý tsıfrlyq júıege kóshti
QYZYLORDA. KAZINFORM – Jol aktıvteri sapasynyń ulttyq ortalyǵy Qyzylorda oblystyq fılıalynyń mamandary búgin oblys ortalyǵynda jańadan salynyp jatqan jol qurylysynyń sapasyn tekserdi. Ol úshin jyljymaly zerthanany paıdalandy.
Fılıaldyń baspasóz qyzmeti habarlaǵandaı, bıyl óńirde jol-kólik ınfraqurylymyn jaqsartýǵa 42 mlrd teńge bólingen. Sonyń esebinen júzege asyrylyp jatqan jobalardyń biri – qaladaǵy Táýelsizdikke 25 jyl dańǵylyn Ábilqaıyr han kóshesinen Salamatov kóshesine deıin uzartý. Osy oraıda Syrdarııa ózeniniń boıymen 2,8 shaqyrym jańa jol salynyp, darııa bógeti nyǵaıtylyp jatyr.
– Jumys mamyr aıynda bastaldy. Sodan beri joldyń negizgi qabaty salyndy. «ÝAD» kompanııasy qazir birqatar ýchaskege asfalt tóseýdi bastap ketti. Bizdiń mamandar qurylys materıaldarynan 5 ret synama aldy. Joldyń sapasy udaıy baqylaýda. Zerthanalyq tekserý barysynda óreskel kemshilikter anyqtalǵan joq. Degenmen, birqatar syn-eskertpe berildi. Merdiger ony ýaqytyly ári talapqa saı túzetti, - dedi fılıal dırektory Maqsat Muqanov.
Onyń aıtýynsha, jyl basynan beri 126 nysanda 607 ret zerthanalyq jáne aspaptyq tekserý júrgizilgen. Barlyǵy 1714 synama alynyp, tıisti saraptama jasaldy.
Osy kúni Qyzylorda-Jezqazǵan respýblıkalyq avtojolynyń qala aýmaǵynan ótetin 2-12 shaqyrym aralyǵy da ortasha dárejeli jóndeý satysynda. Jumysty «QazAvtoJol» ulttyq kompanııasy qarjylandyrǵan. Avtojol qalanyń Qaraýyltóbe, Dosan, Abaı eldi mekenderi men Báıterek shaǵyn aýdany turǵyndarynyń kólik qatynasyna oń septigin tıgizedi. Ulttyq sapa ortalyǵynyń jyljymaly zerthanasy arqyly jańadan tóselgen asfalt jabyndysynan synama alyndy. Mamandar buǵan deıin de jol sapasyn 40 márte tekserip, barlyǵy 122 synama zerthanalyq tekserýden ótken.
- Ortasha jóndeýden ótetin avtojoldyń uzyndyǵy — 9,5 shaqyrym, eni – 14 metr. Jer tósemesi keńeıtilip, 7,3 shaqyrymynda joldyń negizdemesi 20 santımetr qalyńdyqta resaıklerleý ádisimen jasaldy. Sodan keıin 6 shaqyrym uzyndyqta 8 santımetr iri túıirshikti asfalt, jamylǵynyń joǵarǵy qabatyna 5 santımetr qıyrshyq tasty mastıkalyq asfalt tósele bastady. Búginde joǵarǵy qabatyndaǵy 1,6 shaqyrymy oryndaldy. Ol aralyqta kezeń kezeńimen kólik júre bastaıdy, - dedi «QazAvtoJol» UK» AQ QOF dırektorynyń orynbasary Ersaıyn Muzafar.
Jol qurylysynan alynǵan barlyq synama ortalyqtyń zamanaýı zerthanasynda saraptamadan ótedi. Avtomattandyrylǵan qondyrǵylar arqyly asfalt jabyndysynyń tyǵyzdyǵy, sýǵa qanyǵý koeffıtsıenti ólshenip, onyń quramyndaǵy qıyrshyq tas pen qumnyń da sapasy anyqtalady.
- Aımaq joldarynyń sapasyn arttyrýdaǵy eń basty talap — qurylys materıaldaryn saraptamadan ótkizetin zerthana zaman talabyna saı bolýy kerek. Ulttyq sapa ortalyǵynda qazir qaǵazbastylyq joq. Joldan alynǵan árbir synama arnaıy planshet arqyly bazaǵa tirkeledi. Asfalt jabyndysy nómirlenip, qandaı saraptama júrgizilgeni jáne onyń nátıjesi platformada kórsetiledi. Bul baǵytta biz tolyq tsıfrlyq júıege kóshtik. Zerthanada sońǵy úlgidegi 100-den astam qondyrǵy bar. Buryn bir synamaǵa 10-15 kúnimiz ketetin , qazir 3 kúnniń ishinde sapasyn anyqtap beremiz. Mamandarymyz jyl saıyn shet elderde biliktiligin arttyryp, ozyq tájirıbeni óndiriste qoldanyp júr, - dedi zerthana meńgerýshisi Maǵjan Qasymhan.
Aıta keteıik, Jol aktıvteri sapasynyń ulttyq ortalyǵy Qyzylorda oblystyq fılıalynyń ókilderi jýyrda ǵana Qyzylorda-Jezqazǵan jolynyń sapasyn tekserip, kemshilikter anyqtady.