Qyzylordada jol qurylysyna qatysty eki tehnıkalyq qadaǵalaýshy lıtsenzııasynan aıyryldy

QYZYLORDA. KAZINFORM — Qyzylorda oblysynda jol qurylysyna nemquraıly qaraǵan eki tehnıkalyq qadaǵalaýshy lıtsenzııasynan aıyryldy.

Bıyl Qyzylorda oblysynda jol salasynda aýqymdy jumystar atqaryldy. Jol ınfraqurylymyn jaqsartýǵa kólemdi qarjy boıynsha aýyl-aımaqtyń biraz kóshelerine asfalt tústi. Óńirdegi eldimekenderde 69 joba qoldaý taýyp, 99 kóshe jóndeýden ótken.
Memleket qarjysyna salynǵan joldardyń sapasy talapqa saı bolýy jol qurylysyna jaýapty tehnıkalyq qadaǵalaýshynyń basty mindeti. Degenmen keıbir mamandar óz isine salǵyrt qarap, asfalt tóseý jumystaryna tıisti baqylaý júrgizbeıdi.

Jol aktıvteri sapasynyń ulttyq ortalyǵy mamandary bıyl aýdandyq joldarǵa tekserý júrgizip, zerthanalyq zerdeleý barysynda 171 kemshilikti anyqtaǵan. Fılıal óreskel kemshilikterge jol bergen 12 nysan boıynsha merdiger men tehnıkalyq qadaǵalaýshyǵa shara kórý týraly quzyrly mekemege usynys berdi. 

— Jasyratyny joq, jol qurylysy kezinde joba boıynsha bekitilgen keıbir tehnıkalyq qadaǵalaýshylar múldem baqylaý júrgizbeı, tipti basy-qasynda bolmaıdy. Jyl basynan beri quzyrly mekemege 12 usynys berdik. Sonyń 5-ýi áli qaralyp jatyr. Al úsh syn-eskertpemiz eskerildi. Óz isine jaýapsyzdyq tanytqan eki tehnıkalyq qadaǵalaýshyǵa 180 AEK aıyppuldan salynyp, 6 aıǵa lıtsenzııasynan aıyryldy. Sondaı-aq, merdiger kompanııa da 738 400 teńge kóleminde aıyppul tólep, jergilikti bıýdjetke óndirildi, — deıdi fılıaldyń bólim basshysy Erjan Ýsmanov.

Eske salsaq, budan buryn Qyzylorda oblysynda alaýyzdyq týdyratyn jazba taratqan turǵyn sottaldy.