Qyzylordada jynystyq zorlyq-zombylyqtyń aldyn alý júıesi iske qosyldy
QYZYLORDA. KAZINFORM – Respýblıka kóleminde kámeletke tolmaǵandardyń jynystyq tıispeýshiligine qarsy qylmys jasaǵany úshin sottalǵan 504 adam esepte tur. Olar týraly málimet Qyzylorda oblysynda arnaıy aqparattyq baǵdarlamaǵa endi.
Sondaı-aq oblys ortalyǵyndaǵy 12 mekteptiń mańyndaǵy beınebaqylaý kameralaryna ıntegratsııalandy.
– Mehanızmi qarapaıym jáne tıimdi. Qaýipti adam kamera aımaǵynda paıda bolsa, oblystyq polıtsııa departamentiniń «102» arnasyna avtomatty túrde sıgnal túsedi. Polıtsııa qyzmetkerleri sol jerge baryp, zańda kózdelgen profılaktıkalyq shara qabyldaıdy. Osylaısha beınebaqylaý júıesi tek tirkeý úshin emes, qylmystyń aldyn alý úshin jumys istep tur. Bul tájirıbe Bas prokýratýranyń qoldaýymen qazir Astana, Almaty, Shymkent qalalarynda jáne basqa oblystarda qoldanyla bastady, - dedi QR Bas prokýratýrasy Quqyqtyq statıstıka jáne arnaıy esepke alý jónindegi komıteti Qyzylorda oblysy boıynsha departamentiniń bólim bastyǵy Estaı Juqashev.
Bas prokýratýranyń bastamasymen «Kúsheıtilgen profılaktıkany talap etetin tulǵalar tizilimi» analıtıkalyq júıesi iske qosyldy. Júıege ERAP derekteri ıntegratsııalanǵan jáne ár adam boıynsha táýekel deńgeıi anyqtalady. Búgingi kúni osy júıe boıynsha oblys kóleminde joǵary táýekel tobyndaǵy 22 myńnan astam adam anyqtaldy.
– Elimizde 8 myńnan astam mektep bar, onda mıllıondaǵan bala bilim alyp jatyr. Bul jaı ǵana san emes. Ár adamnyń artynda naqty otbasy, jábirlenýshi jáne erteńgi kúni qaıtalanýy múmkin qaýip tur. Bizdiń ortaq mindetimiz – sol táýekeldi barynsha tómendetý, – dedi departament ókili.
Eske sala ketsek, jýyrda balalarǵa jynystyq zorlyq-zombylyq jasaǵandarǵa jazany qatańdatý usynyldy.
