Qyzylordada jyldaǵy dástúrmen «Úlgili eldi meken» konkýrsy ótip jatyr
QYZYLORDA. KAZINFORM — Memleket basshysy Qasym-Jomart Kemeluly 2023-2027 jyldar aralyǵynda aýyldyq aýmaqtardy damytýǵa arnalǵan jarlyǵyna sáıkes Syr óńirinde «Úlgili eldi meken» konkýrsy bastaý aldy.
Mundaǵy maqsat — aýyldyq jerlerde turǵyndardyń ómir súrý sapasyn jaqsartý jáne jaıly ómir súrý ortasyn qalyptastyrý.
Osy rette oblys ákimi N.Nálibaev qoldaýymen eldi mekenderde adam ómiri men densaýlyǵy úshin qolaıly qorshaǵan orta qalyptastyrý, jurtshylyqtyń tabıǵatty qorǵaýy men eldi mekenderdi tazalyq pen kógaldandyrý sharalaryna yntalandyrý maqsatynda oblystyq «Úlgili eldi meken» konkýrsy dástúrli túrde jyl saıyn ótkizilip keledi.
Ótken jyly konkýrs jeńimpazdaryna oblystyq bıýdjetten 990 mln teńge bólinip, arnaıy tehnıkalar alyndy.
Konkýrs nomınatsııalary:
«Úlgili aýdan ortalyǵy» nomınatsııasy:
1 orynǵa — 4 tehnıka (mýsorovoz, jol tazalaǵysh júk kóligi, assenızator mashınasy, kran manıpýlıatory);
2 orynǵa — 3 tehnıka (mýsorovoz, jol tazalaǵysh traktory, assenızator mashınasy);
3 orynǵa — 2 tehnıka (jol tazalaǵysh traktory, assenızator mashınasy).
«Úlgili aýyl» nomınatsııasy:
1 orynǵa — 2 tehnıka (jer qazýshy traktory, júk tasymaldaýshy kóligi);
2 orynǵa — 2 tehnıka (jer qazýshy traktory, traktor tirkemesi);
3 orynǵa — 1 tehnıka (traktor).
«Qyzylorda qalasynyń úlgili shaǵyn aýdany» nomınatsııasy:
1 orynǵa — 3 joba (skver, sporttyq oıyn alańdaryn salý, kóshe-aýlalardy jaryqtandyrý);
2 orynǵa — 2 joba (balalar jáne sporttyq oıyn alańdaryn salý);
3 orynǵa — 1 joba (skver salý).
Bıyl da bul baǵytta 436,0 mln teńgege arnaıy kommýnaldyq tehnıkalar alynady. Qorytyndysy shilde aıynda komıssııamen anyqtalyp, úlgili eldi mekenderge tabystalady.
Ótken jylǵy «Úlgili eldi meken» konkýrsynyń jeńimpazy retinde Syrdarııa aýdany, Naǵı Іlııasov aýyly tanylǵan bolatyn.
Búginde eldi mekenge tabystalǵan arnaıy kommýnaldyq tehnıkalar aýyldy abattandyrý men tazalyǵyn saqtaý baǵytynda qyzmet etýde.
Eldi meken kósheleriniń boıyna 50-ge jýyq konteıner qoıylǵan.
Sanıtarlyq tazalyq jumystaryn qoǵamdyq jumysqa tartylǵan aýyl turǵyndary jáne «Maǵjan ı K» seriktestiginiń arnaıy jumysshylary júrgizip jatyr.
Jalpy, úzdikter kóshin bastaǵan birligi bekem, tirligi kórkem Naǵı Іlııasov aýylyn «Úlgili aýyl» dep aıtýǵa tolyq negiz bar. Jasampaz isterdiń uıytqysy bolǵan bul aýyl elimizdegi bastaý alǵan «Taza Qazaqstan» aktsııasyna óz úlesin qosyp keledi.
Aýyl-aımaqtyń ajaryn aıshyqtap, kelbetin kórkem etetin «Úlgili eldi meken» syndy sharalar turǵyndardyń týǵan jerge, eline degen patrıottyq sezimin oıatyp, ekologııalyq aktsııaǵa turǵyndar belsendiligin arttyrady.
Eske sala ketsek, aımaqta «Taza Qazaqstan» respýblıkalyq ekologııalyq aktsııasyna 90 myńnan astam adam, sonyń ishinde memlekettik mekemeler men jeke uıymdar, eriktiler men turǵyndar qatysyp, is-sharalarǵa barlyǵy 884 tehnıka jumyldyryldy.
Uıymdastyrylǵan tazalyq sharalary nátıjesinde 5654 tonna qoqys qaldyqtary shyǵarylyp, eldi mekenderdegi qoǵamdyq oryndar, skverler men parkter jáne sý aıdyndary men ózen, kól jaǵalaýlary tazartyldy.
Sondaı-aq, kógaldandyrý sharalary aıasynda búgingi kúni 127 908 dana aǵash kóshetteri egildi.
Bul baǵyttaǵy sharalar jalǵasady.
