Qyzylordada jyl basynan beri 23 adamdy kene shaqqan

QYZYLORDA. KAZINFORM – Jyl basynan beri Qyzylordada 23 adam kene shaǵý jaǵdaılarymen medıtsınalyq kómekke júgingen. 

Onyń basym bóligi, dálirek aıtqanda, 16 adam oblys ortalyǵynan bolsa, Shıeliden 4, Jańaqorǵan, Syrdarııa jáne Jalaǵash aýdandarynyń árqaısysynan 1 adamnan tirkelgen.

– Kene kóbine malǵa kútim jasaý, mal qorany tazalaý, tabıǵat aıasynda demalý kezinde, úı janýarlaryna jaqyndaǵannan shaǵady. Byltyr óńirde Kongo-Qyrym gemorragııalyq qyzbasy boıynsha epıdemıologııalyq ahýal qolaısyz boldy. Aýrýǵa kúdikti 18 jaǵdaı esepke alynyp, onyń 9-y klınıkalyq, epıdemıologııalyq jáne zerthanalyq jolmen rastaldy, - dedi oblystyq sanıtarııalyq-epıdemıologııalyq baqylaý departamentiniń basshysy Gúlmıra Syzdyqova. 

2024 jyly oblys boıynsha 115 eldi meken qolaısyz dep tanylsa, bıyl olardyń sany 111-ge azaıdy. Bıyl 9 sáýirde kenege qarsy zalalsyzdandyrý jumysy bastalady. 

Byltyr Túrkistan oblysynda kene shaqqan 1 416 adam medıtsınalyq uıymdarǵa qaralǵan.