Qyzylordada JI-diń kómegimen 832 qylmysker qolǵa tústi

QYZYLORDA. KAZINFORM — Qyzylordada qadaǵalaýshy organ júzege asyryp jatqan «IT TERGEU» jáne «Smart bilezik» jobalary nátıjeli ekenin dáleldedi.

Oblystyq prokýratýradan habarlaǵandaı, atalǵan jobalardyń arqasynda qaıta qylmys jasaý deńgeıi 60%-ǵa, jalpy qylmystylyq kórsetkishi 6%-ǵa tómendedi. Al qylmysty áshkereleý kórsetkishi 3%-ǵa artyp otyr.

— «IT TERGEU» jobasy jasandy ıntellekt múmkindikterin qylmystyq protseste keńinen qoldaný arqyly qylmysty ashý tıimdiligin jáne tergeý jedeldigin arttyrýǵa baǵyttalǵan. Joba iske asyrylǵan 2024-2025 jyldar aralyǵynda 832 qylmysker quryqtalyp, izdeýde júrgen 33 qylmysker ustaldy. Sondaı-aq 595 joǵalǵan adamnyń júrgen jeri anyqtaldy. 170 jasóspirim kezekshi táýlikte ata-anasyna tabystaldy, — delingen habarlamada.

Al «Smart bilezik» jobasy elektrondy baqylaý quraldaryn qoldanýdy ońtaılandyrýǵa, sottalǵandardyń qaıtalap qylmys jasaýyn boldyrmaýǵa jáne probatsııa qyzmetkerleriniń jumys tıimdiligin arttyrýǵa negizdelgen. Oblystyq prokýratýradan habarlaǵandaı, joba iske qosylǵaly esepte turǵandardyń qaıtadan shalys qadam jasaýy 39%-ǵa azaıdy.

Eske salaıyq, Qyzylorda oblysynda jyl basynan beri 200 myńnan astam adamnyń quqyǵy qorǵaldy.