Qyzylordada jetim jáne ata-anasynyń qamqorlyǵynsyz qalǵan 15 bala úı kezegine qoıylmaǵan

QYZYLORDA. KAZINFORM – Qyzylorda oblystyq prokýratýrasy jetim jəne ata-anasynyń qamqorlyǵynsyz qalǵan balalardy turǵyn úımen qamtamasyz etý zańdylyǵyna taldaý júrgizdi. Bul týraly atalǵan vedomstvodan habarlady.

Nátıjesinde turǵyn úıdi tabystaý jáne kezektilikke qoıý barysynda balalardyń quqyǵy buzylǵany anyqtaldy.

– Turǵyn úı qatynastary týraly zańnyń 71-babyna sáıkes jetim jáne ata-anasynyń qamqorlyǵynsyz qalǵan balalardyń zańdy ókilderi 3 aı ishinde balany turǵyn úı alý úshin jergilikti atqarýshy organda esepke qoıýǵa mindetti. Alaıda, ata-anasynyń qamqorlyǵynsyz qalǵan 102 bala turǵyn úı kezegine 3 aıdan keshigip qoıylsa, 15-i múldem qoıylmaǵan. Sonymen qatar komıssııanyń oń sheshim qabyldaǵanyna qaramastan 37 balamen turǵyn úıdi jaldaý sharty jasalmaǵan, – delingen habarlamada.

Prokýrorlyq qadaǵalaý aktisiniń negizinde jetim jəne ata-anasynyń qamqorlyǵynsyz qalǵan 41 bala turǵyn úımen qamtamasyz etildi. Olar túgel kezektilikke qoıyldy. Kináli tulǵalar tártiptik jaýaptylyqqa tartyldy.

Buǵan deıin biz oblystyq prokýratýra «Daryn» oblystyq qosymsha bilim berý ortalyǵynyń bas esepshisi issapar men jalaqyǵa kózdelgen 50 mln teńge bıýdjet qarajatyn óziniń jeke esepshotyna zańsyz aýdaryp alǵany anyqtaǵanyn jazǵanbyz.