Qyzylordada jergilikti kompanııa 1,2 mlrd teńge qosymsha qun salyǵyn tólemegen

QYZYLORDA. KAZINFORM – Jyl basynan beri Qyzylordada qadaǵalaýshy organnyń aralasýymen memleket bıýdjetine 1,5 mlrd teńgeden astam qarjy, 75 mln teńgeden astam ákimshilik aıyppul óndirildi.

Sondaı-aq memleketke quny 524 mln teńge bolatyn múlik qaıtaryldy.

- Salyq zańnamasynyń talaptary buzylǵany da anyqtaldy. «Qyran» kompanııasy 2024 jyly 1,2 mlrd teńge kólemindegi qosymsha qun salyǵyn tólemegen. Qadaǵalaý aktisi negizinde seriktestik memleket bıýdjetine 242 mln teńge óndirdi. Al «Qazsýshar» mekemesiniń Qyzylorda fılıaly arqyly satyp alynǵan 23 myń tonna tas naqty jetkizilmegen, - dedi oblys prokýrory Rızabek Ojarov.

Osylaısha memleketke 326,5 mln teńge zalal kelgen. Atalǵan fakt boıynsha fılıaldyń laýazymdy tulǵalaryna qatysty Qylmystyq kodekstiń 189-baby 4-bóliginiń 2-tarmaǵymen qylmystyq is tirkelip, arnaıy prokýrorlar ony óndirisine aldy.

Qyzylorda oblysynda prokýratýra ınvestordy negizsiz salynǵan 112 mln teńge aıyppul tóleýden bosatty.