Qyzylordada jerasty sýyn retteıtin 123 uńǵyma jańartylady
ASTANA. KAZINFORM — Qyzylorda oblysynda jerasty sýynyń deńgeıin baqylap, sýarmaly jerlerdi qorǵaýǵa arnalǵan 123 tik drenaj uńǵymasy qaıta jańǵyrtylady. Jobany Sý resýrstary jáne ırrıgatsııa mınıstrliginiń Sý sharýashylyǵy komıteti ázirlep jatyr.
Joba Syrdarııa, Jalaǵash, Shıeli jáne Jańaqorǵan aýdandaryn qamtıdy. Onyń aıasynda tik drenaj uńǵymalary kúrdeli jóndeýden ótkizilip, olardy basqarý stantsııalary úshin jańa ǵımarattar salynady. Sondaı-aq uńǵymalardyń úzdiksiz jumys isteýi úshin elektr jelileri tartylyp, transformatorlar ornatylady.
Budan bólek, óndiristik ýchaskeler men «Qazsýshar» RMK ortalyq apparatyna málimetterdi onlaın jiberetin sýdy avtomattandyrylǵan esepke alý júıesin engizý josparlanǵan.
Sý sharýashylyǵy komıtetiniń tóraǵasy Arsen Jaqanbaevtyń aıtýynsha, búginde Qyzylorda oblysynda jalpy 162 tik drenaj uńǵymasy bar.
– Bul uńǵymalar jerasty sýy deńgeıin turaqtandyrýǵa, topyraqtyń sortańdaný qaýpin azaıtýǵa jáne sýarmaly jerlerdiń jaǵdaıyn jaqsartýǵa qajet. Ázirlenip jatqan joba sý resýrstaryn utymdy paıdalanýǵa jáne óńirdiń agrarlyq sektoryn turaqty damytýǵa baǵyttalǵan, – dedi Sý resýrstary jáne ırrıgatsııa mınıstrligi Sý sharýashylyǵy komıtetiniń tóraǵasy Arsen Jaqanbaev.
Eske salaıyq, buǵan deıin elimizde sý únemdeý tehnologııasyn engizýdi qoldaıtyn keshendi baǵdarlama ázirlenetinin habarlaǵanbyz.
