Qyzylordada jer qoınaýyn zańsyz paıdalaný tyıylmaı tur
QYZYLORDA. KAZINFORM – Qyzylorda oblystyq polıtsııa departamenti qoǵamdyq qaýipsizdik basqarmasynyń qyzmetkerleri jyl basynan beri jer qoınaýyn zańsyz paıdalanýdyń 3 deregin anyqtady. Bul týraly departamenttiń baspasóz qyzmeti habarlady.
Quqyqbuzýshylyqtar aýdandar men oblys ortalyǵynda tirkeldi.
– Qum, qıyrshyq tas, saz balshyq, taǵy basqa ınertti materıaldardy zańsyz óndirý jáne tasymaldaý faktilerine erekshe nazar aýdaryldy. Іs-sharalar barysynda Qyzylorda qalasynyń mańynda qıyrshyq tas pen qumdy zańsyz alyp ketpek bolǵan 2 júk kóligi ustaldy. Atalǵan zańbuzýshylyqtar boıynsha jınalǵan materıaldar tıisti sharalar qabyldaý úshin oblystyq ekologııa departamenti men kóliktik baqylaý ınspektsııasyna joldandy, – delingen habarlamada.
Qyzylorda polıtsııasy azamattardy jer qoınaýyn zańsyz paıdalaný, onyń ishinde ınertti materıaldardy zańsyz óndirý jáne áketý faktileri týraly quqyq qorǵaý organdaryna habarlaýǵa shaqyrady.
Buǵan deıin habarlaǵanymyzdaı, Túrkistan oblysynda 221 jer qoınaýyn paıdalanýshynyń tek 98-i ǵana resmı rásimdelgen.
