Qyzylordada jeke mekteptiń 190 qyzmetkerine 142 mln teńge jalaqy bereshegi óteldi
QYZYLORDA. KAZINFORM — Qyzylorda prokýratýrasy jeke mekteptiń 190 qyzmetkerine jalaqy boıynsha 142 mln teńge kólemindegi bereshekti tolyq ótetýge qol jetkizdi.
Eńbek zańnamasy talaptarynyń saqtalýyna júrgizilgen taldaý kezinde qyzmetkerlerge jyl saıynǵy eńbek demalysy úshin tólenetin aqshanyń ýaqtyly ári tolyq tólenbeý faktileri anyqtaldy.
— Sonyń saldarynan bilim berý uıymynyń 190 qyzmetkeri aldynda jalaqy boıynsha bereshek qalyptasqan. Prokýrorlyq qadaǵalaý aktisi negizinde azamattardyń buzylǵan eńbek quqyǵyn qalpyna keltirý jóninde sharalar qabyldandy. Nátıjesinde 142 mln teńge kólemindegi bereshek tolyq óteldi, — delingen oblystyq prokýratýra málimetinde.
Jyl basynan beri Qyzylorda qalasynyń prokýratýrasy 1 998 azamattyń konstıtýtsııalyq quqyǵyn qorǵap, 177,5 mln teńge óndirip aldy.
Eske salaıyq, Jambyl oblysynda alıment boıynsha 8 mln 659 myń teńge qaryz jyljymaıtyn múlik berý arqyly óteldi.
