Qyzylordada jeke mektepterge qatysty aryz-shaǵym jıiledi

Mysaly, oblys ortalyǵyndaǵy «Orda School» mektebinde eńbek etetin ustazdar qaýymy Instagram áleýmettik jelisiniń Krıtıka Qyzylorda paraqshasynda kezekti eńbek demalysynyń aqysyn ala almaı júrgenin alǵa tartqan.

- Úkimet tarapynan aýdarylǵan aqsha esebinen eńbek demalysynyń aqysy tólenbeı otyr. «Shildeniń 20-syna deıin beremiz» degenge sengenbiz, 17 shilde kúni quryltaıshy «qaryzym kóp, bermeımin» dep jaýap berdi. Biz soǵan senip qaldyq. Kredıt bar, bala-shaǵamyzǵa tamaq kerek, emdelýdi josparlaǵanbyz. Tamyz aıynda eshqashan aılyq tólemegen. Qarsy shyqsaq, jumystan qýylamyz, - delingen jazbada.

Muǵalimderdiń ótinishine oblystyq bilim basqarmasy ún qatty.

- 2026 jylǵy qańtar-aqpan aılaryna jeke mektepterden memlekettik tapsyrysqa ótinish qabyldaý úshin Qazaqstan Respýblıkasynyń Qarjy mınıstrligi tarapynan ázirlengen «Orta bilim» elektrondy platformasyna 19-25 aqpan aralyǵynda ótinishter qabyldandy. Pılottyq jobada aıqyndalǵan talaptarǵa sáıkes kelgen «Orda School» mektepterimen qańtar-mamyr aılaryna memlekettik tapsyrys ornalastyrý boıynsha mindettemelerge qol qoıyldy. Naqty oryndalǵan jumystardyń jáne oqýshy kontıngentiniń sanyna sáıkes qarjy tolyǵymen tólendi, - delingen habarlamada.

Basqarma bul máseleniń memlekettik tapsyrys ornalastyrylǵan merzim boıynsha anyqtalatynyn atap ótti.

Jeke mektepterge qatysty shaǵymnyń kóbeıgenin Memlekettik eńbek ınspektsııasy komıtetiniń Qyzylorda oblysy boıynsha departamenti rastady. Bıyl 6 aıda ınspektsııaǵa túsken ótinish sany byltyrǵydan 15%-ǵa kóbeıse, onyń bir sebebi osy bolyp tur.

- Bizdiń ınspektorlar baryp tekseredi, nusqama beredi. Sotqa deıin súıemeldep, sol aralyqtaǵy jaǵdaıdy baqylaýda ustaıdy. Aıyppul salady. Ony ýaqytyly tólemese, ári qaraı talap etý quqyǵymyz shekteledi. Odan keıingisin sot sheshedi. Negizi quqyǵy buzylǵan árbir qyzmetker birden sotqa júginse bolady. Sotqa materıal túse me, oǵan memlekettik eńbek ınspektsııasy da, prokýratýra da, basqa eshqandaı memlekettik organ aralasa almaıdy. Biz tek qylmystyq is boıynsha úkim shyqqanyn kútemiz, - dedi departament basshysy Bektemir Jumaǵulov.

Oblystyń bas memlekettik eńbek ınspektory osy oraıda áleýmettik jelidegi jazba tekserý júrgizýge negiz bola almaıtynyn atap ótti. Ol úshin departamentke ótinishpen júginý kerek nemese basshysynyń jeke qabyldaýyna kirýge bolady. Aıtatyn jáıt, bıyldyń ózinde elimizde 22 jekemenshik mektep lıtsenzııasynan aıyryldy. Negizgi sebepteri — bilim berý standarttaryn oryndamaý jáne bilim salasyndaǵy zańnamalyq talaptarǵa sáıkes kelmeý.