Qyzylordada jeke mektep ǵımaraty kommýnaldyq menshikke beriletin boldy
QYZYLORDA. KAZINFORM — Búgin oblys ákimi Nurlybek Nálibaevtyń qatysýymen R.Áliarystanuly atyndaǵy jeke mektepti memlekettik menshikke alý boıynsha memorandýmǵa qol qoıý rásimi ótti. Oǵan jaýapty sala basshylary, selektorlyq rejımde qala, aýdan ákimderi, zııaly qaýym ókilderi qatysty.
Aımaq basshysy atqarylǵan aýqymdy jumystarǵa, sońǵy jyldary bıýdjet qarjysynyń basym bóligi áleýmettik salaǵa, onyń ishinde bilim salasyna baǵyttalǵanyna toqtaldy.
– Óńirimizde Prezıdentimizdiń, Úkimettiń erekshe qoldaýymen tyń bastamalar júzege asyrylyp jatyr. Jas urpaqtyń sapaly bilim alýy – jumysymyzdyń basty basymdyǵy. Bilim berý salasyna sońǵy 3 jylda 812 mlrd. 245 mln. teńge, bıyl 302 mlrd. teńge qaraldy. Bólingen qarjynyń túpkilikti maqsatqa jetýin qadaǵalaýdyń naqty sharalary qabyldanǵan. 2023 jyldan beri «Feıs-baqylaý» mobıldik qosymshasy qoldanysqa engizilip, balabaqshalarǵa jalǵan tirkelgen 19 263 bala anyqtaldy, 28 mlrd. 100 mln. teńge únemdeldi. Emhananyń jalǵan anyqtamasyn tirkeý, negizsiz demalys kúnderin anyqtaý esebinen 6 mlrd. 700 mln. teńge bıýdjetke qaıtaryldy, – dedi oblys ákimi Nurlybek Nálibaev.
Ákimniń sózinshe Ooblysta demografııalyq ósim men halyqtyń kóship-qoný belsendiligi joǵary bolǵandyqtan, oqýshy sanynyń jyl saıyn artqany baıqalady. Jańa oqý jylynda 1-11 synypta 189 288 oqýshy tirkeldi, ótken oqý jylymen salystyrǵanda 4 364 balaǵa kóbeıgen.
– Osy rette oryn qajettiligi jeke ınvestıtsııa esebinen de sheshimin taýyp jatyr. Jeke sektorǵa memleket tarapynan qoldaý jasalǵan. Biz óz kezegimizde taza, shynaıy jumys isteıtin kásipkerlerdi únemi qoldap kelemiz. Ótkende memleket jáne qoǵam qaıratkeri Murat Baqtııaruly bıznestiń áleýmettik jaýapkershiligi aıasynda 2023 jyldyń qyrkúıeginde ashylǵan «Orda skýl-2» jeke mektebin memleket menshigine syıǵa berdi. Búgin de dál sondaı ıgi istiń kýási bolamyz. Bizdiń eń birinshi mindetimiz – balalarymyzdyń jan-jaqty, sapaly bilim alýyna qolaıly jaǵdaı jasap, jaıly orta qalyptastyrý. Óskeleń urpaq tárbıesimen aınalysatyn barsha bastamalaryńyzǵa sáttilik tileımin jáne ortaq jumysty birlesip atqarýǵa shaqyramyn, – dedi N.Nálibaev.
Rásimde oblystyq bilim basqarmasynyń basshysy Asqarbek Esjanov pen R.Áliarystanuly atyndaǵy jeke mekteptiń quryltaıshysy Shárkúl Imanberdıeva mektep ǵımaratyn oblystyq kommýnaldyq menshikke berý týraly memorandýmǵa qol qoıdy.
Sonymen birge Shárkúl Imanberdıeva, memleket jáne qoǵam qaıratkeri Baqbergen Dosmanbetov, «Ulaǵat» mektebiniń quryltaıshysy, Qazaqstannyń eńbek sińirgen qaıratkeri Qalqazbek Ájibekov sóz sóılep, jas urpaqqa sapaly bilim berýdiń mańyzdylyǵyna toqtaldy.
Aıta ketý kerek, ótken jyly óńirde 13 bilim berý uıymy jańadan ashyldy. «Keleshek mektepteri» ulttyq jobasy aıasynda 10 mektep salynyp, paıdalanýǵa berildi.
