Qyzylordada jedel járdemge kúnine 2 myńnan astam ótinish túsedi
QYZYLORDA. KAZINFORM – Qyzylorda oblystyq jedel medıtsınalyq járdem stantsııasy táýlik boıy 2 myńnan astam ótinish qabyldaıdy.
Búginde óńirde 70 brıgada jumys isteıdi. Stantsııanyń aǵa dárigeri Lázzat Medetovanyń aıtýynsha, shaqyrtýlar barlyq jedeldik sanaty boıynsha qabyldanady.
– Kúnine túsetin 2 myńnan astam ótinishtiń shamamen 600-i balalarǵa qatysty. Brıgadalar táýligine orta eseppen 1700-ge jýyq shaqyrtýǵa shyǵady. Sonyń shamamen 400 jaǵdaıynda patsıentter medıtsınalyq tekserýden keıin statsıonarǵa jatqyzylady. Qyzmetke túsetin júktemeniń eń joǵary kezeńi – kúnniń ekinshi jartysy, – dedi ol.
Eger buǵan deıin stantsııa 1, 2, 3-sanattaǵy shaqyrtýlarǵa qyzmet kórsetse, qazirgi tańda onyń jaýapkershilik aımaǵyna 4-sanattaǵy shaqyrtýlar da engizildi. Bul qatarǵa ómirge tikeleı qaýip tóndirmeıtin, alaıda medıtsınalyq aralasýdy qajet etetin jiti aýrýlar men sozylmaly aýrýlardyń asqynýy jatady.
Áleýmettik medıtsınalyq saqtandyrý qory Qyzylorda oblysy boıynsha fılıalynyń bas sarapshysy Aıgúl Ahanovanyń aıtýynsha, 2026 jylǵy 1 qańtardan bastap elimizde medıtsınalyq kómektiń biryńǵaı bazalyq paketi kezeń-kezeńimen engizilip jatyr. Ol tegin medıtsınalyq kómektiń kepildik berilgen kólemi men mindetti áleýmettik medıtsınalyq saqtandyrý aıasynda medıtsınalyq qyzmetterdi ajyratýdy kózdeıdi.
– Shuǵyl medıtsınalyq kómek azamattarǵa MÁMS júıesindegi saqtandyrylǵan mártebesine qaramastan qoljetimdi bolyp qala beredi. Bul adam ómiri men densaýlyǵyna qaýip tóndiretin jaǵdaılarda qajetti medıtsınalyq kómekti qamtamasyz etý úshin asa mańyzdy. Medıtsınalyq kómek ýaqtyly ári árbir turǵyn úshin qoljetimdi bolýy tıis, – dep atap ótti qor ókili.
Jedel medıtsınalyq járdem qyzmetin qarjylandyrý Áleýmettik medıtsınalyq saqtandyrý qory tarapynan qoldanystaǵy normatıvtik qujattarǵa sáıkes júzege asyrylady. 2026 jylǵa arnalǵan satyp alý josparynda Qyzylorda oblysynda TMKKK aıasynda jedel jáne shuǵyl medıtsınalyq kómek kórsetýge 6 mlrd 814 mln teńge qarastyrylǵan.
Eske salaıyq, shildede Almatyda aptap ystyqtyń saldarynan jedel járdemdi shaqyrtý kóbeıgenin jazdyq. Qalalyq Qoǵamdyq densaýlyq saqtaý basqarmasynyń málimetinshe, shildeniń alǵashqy eki aptasynda jedel járdem qyzmetine 33,6 myńnan astam shaqyrtý túsken.
