Qyzylordada jedel ishek aýrýyn juqtyrý sebepteri ataldy
QYZYLORDA. KAZINFORM — Qyzylorda oblystyq sanıtarııalyq-epıdemıologııalyq baqylaý departamenti óńirdegi jedel ishek ınfektsııalary aýrýshańdyǵy boıynsha epıdemıologııalyq jaǵdaıdy birqalypty dep baǵalap otyr.
Jyl basynan beri ınfektsııa juqtyrýdyń 413 jaǵdaıy tirkeldi. Ótken jyldyń osy kezeńimen salystyrǵanda syrqattanýshylyq deńgeıi 6,3%-ǵa tómendegen. Aýrýǵa shaldyǵý derekteriniń basym bóligi oblys ortalyǵynyń úlesinde — 96%. Juqpaly jedel ishek aýrýlarymen naýqastanǵandardyń 77%-y — 14 jasqa tolmaǵan balalar.
Departament qyzmetkerleri aýrýdyń basty taralý sebepteri retinde úı jaǵdaıynda daıyndaý tehnologııasy buzylǵan, durys saqtalmaǵan taǵamdardy, qaınamaǵan sýdy tutynýdy jáne bala kútimi barysynda jeke bas gıgıenasyn saqtamaýdy atady.
— Sonymen qatar merziminen erte pisken jemis-jıdekterdi mólsherden tys paıdalaný da aýrýǵa shaldyǵý qaýpin arttyrady. Aýrýdyń aldyn alý úshin jeke bas gıgıenasyn saqtaýdy, tek qaınatylǵan nemese bótelkedegi tazartylǵan sýdy paıdalanýdy, jemis pen kókónisti jaqsylap jýýdy, tez buzylatyn tamaq ónimderin salqyn jerde saqtaýdy, jaramdylyq merzimi ótken azyq-túlikti paıdalanbaýdy usynamyz. Sonymen qatar shıki ónimderdi daıyn ónimderden bólek saqtaý, sýburqaqtarǵa sýǵa túspeý, tek arnaıy belgilengen oryndarda shomylý jáne asúıdi, aýlany taza ustaý kerek. Aýrý belgileri baıqalǵan jaǵdaıda medıtsınalyq kómekke júginý qajet, — dedi departament basshysynyń mindetin atqarýshy Erlan Uzaqbaev.
Aıta keteıik, kóktem men kúz mezgilinde las qoldyń aýrýyna jatatyn ishek ınfektsııalarymen syrqattaný deńgeıi aıtarlyqtaı artady.
