Qyzylordada jazasyn óteýshilerdiń 72%-y jumyspen qamtylǵan
Qyzylorda. KAZINFORM — Oblystyq qylmystyq atqarý júıesi departamentine qarasty № 60 mekemeniń óndiristik aımaǵynda 19 kásipker óz kásibin ashyp, sottalǵan azamattardy turaqty jumyspen qamtyp otyr.
ıAǵnı, Qyzylorda oblysynda sottalǵandardy jumyspen qamtý isi jolǵa qoıylǵan.
— Óndiristik aımaqtarda olar gaz, qum bloktaryn, kirpish shyǵarýmen, tigin óndirisimen, dánekerleý isimen, sondaı-aq qolónermen aınalysady. Al № 37 mekemede jazasyn óteýshiler13 jeke kásipkerdiń qaramaǵynda eńbek etip júr. Atap aıtqanda, tigin sheberhanalarynda, jol jóndeý, jıhaz jasaý tsehtarynda, qurylys pen dánekerleý nysandarynda, jylyjaılarda jumys isteıdi. Sondaı-aq qum blogyn shyǵarady, — dedi departamenttiń ishki kommýnıkatsııa qyzmetiniń mamany Danagúl Dostanova.
Jalpy, oblystyń qylmystyq atqarý júıesi mekemelerindegi jazasyn óteýshilerdiń 72%-y turaqty jumyspen qamtylǵan. Olardy qoǵamǵa qaıta beıimdeý, áleýmettendirý jáne bostandyqqa shyqqannan keıin turaqty jumysqa ornalasýyna jaǵdaı jasaý maqsatynda skills.enbek.kz onlaın platformasy negizinde qaıta daıarlaý kýrstary uıymdastyrylady.
— Ótken jyly 43 adam osy platforma arqyly birneshe mamandyq boıynsha bilim alyp, tıisti sertıfıkattarǵa ıe boldy. Onyń ishinde tigin, kassır, dánekerleýshi, aspaz mamandyqtarynyń qyr-syryn meńgerdi. Bıyl taǵy 50-ge jýyq adamdy oqytý josparlanyp otyr, — dedi departament ókili.
Aıta keteıik, ótken kúzde Qyzylorda oblysynyń ákimi túzeý mekemesiniń óndiristik aımaǵymen tanysty.