Qyzylordada jazasyn óteýshiler tiginmen aınalysyp júr
QYZYLORDA. KAZINFORM — Qyzylorda oblystyq qylmystyq atqarý júıesi departamentiniń qaýipsizdigi barynsha tómen № 37 mekemesinde jazasyn ótep jatqan azamattardyń barlyǵy eńbekpen qamtylǵan.
Olardyń qatarynda tigin kásibin meńgerip júrgender de bar.
— «Dalatex» tigin tsehynda 20-ǵa jýyq jazasyn óteýshi eńbek etedi. Munda arnaıy kıimder tigilip, óndiristik jumys atqarylady. Jazasyn óteýshiler jumys barysynda tigin tigýdi, kıim bólshekterin óńdeýdi jáne daıyn ónimge qajetti jumysty oryndaýdy úırenedi, — delingen departament habarlamasynda.
Jaza basqandardy eńbekpen qamtý — olardyń túzelýine jáne qoǵamǵa qaıta beıimdelýine baǵyttalǵan mańyzdy qadam. Solardyń biri mekemege kelgennen keıin tigin isine qyzyǵýshylyq tanytyp, kúrdeli iske den qoıǵan.
— Daıyn kıimderdiń túımelerin qadaımyn, keıde tigin tigemin. Bul jumysty osynda kelip úırendim. Tigin tigý kezinde oıyń bólinip, jumysqa kóńil qoıasyń. Er azamat bolsam da bul kásipti meńgerý maǵan qıyn bolǵan joq. Qazir tigin isine qyzyǵýshylyǵym artyp keledi. Men abaısyzda jol-kólik oqıǵasyn jasap, sottaldym. Otbasym bar. Jalaqymdy otbasyma jiberip turamyn. Bostandyqqa shyqqan soń da tigin isin jalǵastyrǵym keledi. Sondyqtan qazirden bastap bul kásipti ábden meńgerýge tyrysyp júrmin, — dedi ol.
Eske salaıyq, elimizde qylmys jasap, sottalǵan 30 myńnan astam azamat abaqtyda jazasyn ótep jatyr.
