Qyzylordada jazasyn óteýshi er adamdar tiginmen aınalysyp júr
QYZYLORDA. KAZINFORM — Qyzylorda oblysy boıynsha qylmystyq atqarý júıesi departamentiniń № 37 túzeý mekemesinde jazasyn óteýshiler túgel jumyspen qamtylǵan.
Olarǵa oblys ortalyǵyndaǵy 20-dan astam kásipker jumys taýyp bergen. Mekeme ákimshiligi jýyrda taǵy birneshe sottalǵan adamdy tigin tsehyna jumysqa ornalastyrdy.
— Tiginshi áıelder kıim pishý, tigýmen aınalysady. Kóbinese qyz-kelinshekterge arnalǵan kóılekter men formaly kıimder tigedi, — dedi departamenttiń ishki kommýnıkatsııa qyzmetiniń mamany Danagúl Dostanova.
Mata, ıne-jipti tseh basshylyǵy jetkizip turady eken. Munda tiginshi bolyp eńbek etýshilerdiń biri — Perızat bul isti anasynan úırengen.
— Sondyqtan jumysqa tez kirisip kettim. Jalaqy ýaqytyly beriledi. Onyń bir bóligine qajet nársemdi alyp, artylǵanyn otbasyma jiberip otyramyn. Bostandyqtyń qadirin kesh túsingenime ókinemin. Otbasyma tezirek oralǵym keledi. Kópbalaly anamyn, balalarymdy saǵyndym. Jasaǵan qateligimnen sabaq ala bildim, — dedi ol.
Aınur túzeý mekemesine 2021 jyly túsken. Tigin mashınasymen jumys jasaýdy osy jaqtan úırenipti.
— Áıel bolǵasyn ıne-jip ustaı alamyn. 4 jyl ishinde tiginshilik istiń qyr-syryn birshama meńgerdim. Qazir fýtbolkalar tigip jatyrmyz. Tapsyrys bar, sony ýaqytyly oryndaýǵa tyrysamyz. Kúnine 30 shaqty kıim tigemiz. Jumysym ózime unaıdy. Bostandyqqa shyqqasyn osy kásipti odan ári damytqym keledi, — dedi keıipkerimiz.
Departamenttiń № 60 mekemesinde jazasyn ótep jatqan 13 adam mekemeniń óndiristik aımaǵyndaǵy «Eńbek-Qyzylorda» RMK tigin tsehynda eńbek etip júr. Olardyń arasynda tiginshi mamandyǵyn oqyp, dıplom alǵan er adamdar da bar. Olar tapsyrys negizinde arnaıy kıimnen bastap tósek-jabdyqqa deıin tigedi.
Óndiristik aımaqta budan basqa naýbaıhana, qolóner buıymdaryn, kirpish, peskoblok shyǵaratyn tseh bar.
Aıta keteıik, sońǵy 5 jylda Qyzylordada sottalǵandar sany 57,5%-ǵa ósken.