Qyzylordada jaıaý júrginshige jol bermegen kólikterdi anyqtaıtyn júıe iske qosyldy
QYZYLORDA. KAZINFORM — Qyzylorda qalasynda jol qozǵalysy qaýipsizdigin arttyrý maqsatynda «Suńqar» apparattyq-baǵdarlamalyq keshenderiniń jaıaý júrginshilerdi anyqtaý fýnktsııasy iske qosyldy.
Oblystyq polıtsııa departamenti júıe testtik rejımde jumys isteı bastaǵanyn málimdedi.
— Júıe jaıaý júrginshige arnalǵan ótkelderde júrgizýshilerdiń jol qozǵalysy qaǵıdalaryn buzý derekterin avtomatty túrde tirkeıdi. Atap aıtqanda, jaıaý júrginshilerge nemese jol qozǵalysynyń ózge qatysýshylaryna jol bermegen kólikterdi anyqtaıdy. Jobanyń basty maqsaty — jaıaý júrginshilerdiń qaýipsizdigin qamtamasyz etý jáne jol-kólik oqıǵalarynyń aldyn alý, — delingen habarlamada.
Tártip saqshylary osy oraıda jol qozǵalysyna qatysýshylardy jol júrý qaǵıdalaryn qatań saqtaýǵa, jaıaý júrginshi ótkelderinde joldan ótýshilerge mindetti túrde basymdyq berýge jáne ózara qurmet qaǵıdatyn ustanýǵa shaqyrady.
Eske salaıyq, bıyl Almaty oblysynyń respýblıkalyq joldarynda ortasha jyldamdyq júıesi engizildi.
