Qyzylordada jataǵan ý kekirege qarsy 100 gektarǵa jýyq jer óńdeledi

QYZYLORDA. KAZINFORM – Mamyr aıynyń sońyna qaraı Qyzylorda oblysynda karantındik zııankesterge qarsy hımııalyq óńdeý jumysy bastalady.

Onyń ishinde jataǵan ý kekirege qarsy 97,5 gektar, qaýyn shybynyna qarsy 1750 gektar, kalıfornııalyq qalqansha symyryna qarsy 34,5 gektar, aramsoıaýǵa qarsy 427,87 gektar jerdi óńdeý josparlanyp otyr.

– Óńirde karantındik zııankesterden kalıfornııalyq qalqansha symyry men qaýyn shybyny, karantındik aramshóptiń ishinde kekire men saryshyrmaýyq keń taralǵan. Ótken jyly jataǵan ý kekirege qarsy 137,5 gektar, qaýyn shybynyna qarsy 1750 gektar jerge respýblıkalyq bıýdjet qarajaty esebinen hımııalyq óńdeý jumysy júrgizildi. Kalıfornııalyq qalqansha symyryna qarsy 43,5 gektar jáne aramsoıaýǵa qarsy 427,87 gektar jer zalalsyzdandyryldy, – dedi AShM agroónerkásiptik keshendegi memlekettik ınspektsııa komıteti Qyzylorda oblystyq aýmaqtyq ınspektsııasynyń basshysy Muhtar Orazbaev.

Bıyl shegirtkeniń erekshe qaýipti túrleri – ıtalııalyq prýs pen azııalyq shegirtke qarsy 60,024 myń gektar, al saıaq shegirtke boıynsha 55 394 gektar jer óńdeledi. 

Oblysta kenege qarsy dezınfektsııa jumysynyń alǵashqy kezeńi 9-21 sáýir aralyǵyna, ekinshi kezeńi 18-30 sáýir aralyǵyna josparlanǵan.