Qyzylordada «Jastarmen birge» onkúndigi OPEN AIR jastar festıvalimen qorytylandy
QYZYLORDA. KAZINFORM – Qyzylordada jastar kúnine arnalǵan onkúndik qorytylandy. Arnaıy uıymdastyrylǵan merekelik sharada oblys ákiminiń orynbasary Shahmardan Baımanov qoǵamnyń qozǵaýshy kúshi - jastardy merekemen quttyqtap, jyly lebizin bildirdi.
Prezıdentimizdiń, Úkimettiń, oblys ákiminiń qoldaýymen aımaq jastarynyń áleýmettik jaǵdaıyn jaqsartýǵa baǵyttalǵan jobalar júzege asyrylyp keledi.
Qazirgi tańdaǵy ózekti máselelerdiń biri - óńir jastaryn qoljetimdi turǵyn úımen qamtamasyz etý úshin aımaqta alǵash ret «Syr jastary» óńirlik turǵyn úı baǵdarlamasy» qabyldandy.
Nátıjesinde jyl basynda 60 jas otbasy qonys toıyn toılasa, jaqyn kúnderi 40 jas otbasyǵa páter kiltteri tabystalmaq.
Bıyl bilimdi jastarymyzdy qoldaý maqsatynda dástúrge aınalǵan aımaqqa qajetti mamandyqtar boıynsha oblys ákiminiń 100 granty taǵaıyndaldy.
Jastardyń kásipkerlik bastamalaryn qoldaý, olarǵa kásippen shuǵyldanýǵa qolaıly jaǵdaı qalyptastyrý maqsatynda qarjylyq qoldaý baǵdarlamasy arqyly nesıe portfeli 3,7 mlrd. teńge bolatyn jas kásipkerlerdiń 130 jobasy sýbsıdııalandy.
2,1 mlrd. teńgege jas kásipkerlerdiń 115 jobasy boıynsha kepildik sharty jasalsa, «Agrarlyq nesıe korporatsııasy» arqyly jas kásipkerlerdiń 48 jobasy qarjylandyryldy.
100 myń jasty jumyspen qamtý tapsyrmasyna sáıkes bıyl aımaǵymyzda 6 myńǵa jýyq jas jumyspen qamtylady.
Búginde oblys kóleminde NEET sanatyndaǵy jastardyń úlesin tómendetýge barynsha kúsh-jiger jumsalýda. Osy maqsatta arnaıy Jol kartasy qabyldanady.
Jastardyń bos ýaqytyn tıimdi uıymdastyrý jáne mádenı-rýhanı damýyna barlyq jaǵdaı jasalýda.
Sońǵy eki jyldyń ózinde kóptegen áleýmettik nysandar boı kóterdi.
Talantty jastarymyzdy qoldaý maqsatynda myń oryndyq «Óner ortalyǵy» salynsa, qala jáne aýdandarda 171 mádenıet úıi janynda «Adal adam» mádenı-rýhanı ortalyqtary óz jumystaryn bastap ketti.
Osy ıgi bastamalardyń jalǵasy retinde bıylǵy jyly 7 aýdanda «Rýhanııat» ortalyqtary, mýzykalyq kolledj, ınnovatsııalyq shyǵarmashylyq ortalyǵy, «Oqýshylar saraıynyń» qurylysy júrýde.
Jas otbasylarǵa otbasy qundylyǵyn nasıhattaý, ulttyq qundylyqtardy dáripteý, «otbasy», «shańyraq» uǵymynyń qadir-qasıetin túsindirý maqsatynda «Otbasy ortalyǵy» jáne balaýsa boıjetken qyz baladan ardaqty asyl ájege deıin bas qosatyn tal besik - tárbıe mektebine aınalǵan «Anaǵa taǵzym ortalyǵy» óz qyzmetin júzege asyrýda.
Baıraqty básekelerde kók týmyzdy jelbireter bolashaq chempıon jastarymyz úshin zamanaýı 10 myń oryndyq stadıon, ústel tennısi ortalyǵynyń qurylysy bastalsa, aldaǵy ýaqytta kóp fýnktsıonaldy «Qyzylorda arena» keshenin salý josparlanýda.
Jalpy byltyrdyń ózinde 9 sport kesheni qoldanysqa berilip, bıyl 15 keshenniń qurylys jumystary júrgizilmek.
Memleket basshysynyń bastamasymen qolǵa alynǵan «Jaıly mektep» ulttyq jobasy aıasynda óńirimizde 21 mektep salynady. Osynyń barlyǵy jastarymyzdyń ıgilikteri úshin!»,- dedi óz sózinde oblys ákiminiń orynbasary.
Qorytyndy sharada 20 jas marapattaldy. Olarǵa QR Mádenıet jáne aqparat mınıstriniń «Qurmet gramotasy», «Alǵys haty» jáne oblys ákiminiń «Alǵys hattary» tabystaldy. Marapattalǵandar quramynda mehanızator, kásipker, erikti, oqytýshy, jýrnalıst, gıdrometallýrg, sportshy, ónerpaz, IT salasynyń mamandary sekildi jastar bar.
Budan bólek «Táýelsizdik urpaqtary» oblystyq baıqaýynyń jeńimpazdaryna 250 myń teńgeniń sertıfıkaty tabystaldy. Atalǵan marapat ıeleriniń barlyǵy túrli baǵyt boıynsha jańa kásip bastaǵan jastar.
Bıyl Halyqaralyq jastar kúni «Jastarmen birge» ulttyq onkúndik retinde qala, aýdandarda atap ótildi.
Ár kún belgili bir taqyrypqa arnalyp, onkúndik aıasynda aımaqta «Múmkindikter alańy» sharasy, «Taza Qazaqstan» ekologııalyq aktsııasy, sporttyq sharalar, «Deni saý jas – el bolashaǵy» atty medıtsınalyq keńes berý, «Adal azamat» beıresmı kezdesýleri, «Igi ister marafony» qaıyrymdylyq aktsııasy, «Túngi kitaphana», «Ziyatker quest» ıntellektýaldy saıysy, «Donor bol» aktsııasy, «Aspan sınema» sharasy ótkizildi.
Jalpy osy baǵytta oblys boıynsha 385 shara uıymdastyrylsa, onda 50 myńǵa jýyq jastar qamtylǵan.
