Qyzylordada jastar kúnine arnalǵan Open Air kontsertine 12 myń adam jınaldy
QYZYLORDA. KAZINFORM — Qyzylorda qalasynyń ortalyq alańynda 12 tamyz – Halyqaralyq jastar kúnine arnalǵan jastar onkúndiginiń qorytyndy sharasy ótti.
Onkúndik «Jastarmen birge!» atty aýqymdy Open Air formatyndaǵy merekelik kontsertpen túıindeldi.
Ashyq aspan astynda ótken merekelik keshke 12 myńnan astam qala turǵyny men jastar jınaldy.
Merekelik sharaǵa oblys ákiminiń orynbasary, Qazaqstan Respýblıkasy Prezıdentiniń «Baıqońyr» keshenindegi arnaýly ókili Qaırat Nurtaı qatysyp, óńir jastaryn merekemen quttyqtady.
— Jastar — eldiń erteńin kútetin býyn ǵana emes, búgingi qoǵamnyń qozǵaýshy kúshi. Mereke qarsańynda sońǵy on kún ishinde óńirimizde jastardyń bilimin jetildirýge, shyǵarmashylyq qabiletin shyńdaýǵa, qoǵamdyq belsendiligin arttyrýǵa jáne salaýatty ómir saltyn nasıhattaýǵa baǵyttalǵan túrli is-sharalar uıymdastyryldy. Bul — jastar saıasatynyń bir kúndik naýqany emes, júıeli ári turaqty baǵyt ekenin kórsetedi. Syr jastary qaı kezde de eldik bastamalardyń bel ortasynan tabylyp keledi, — dedi Qaırat Yrzaqululy.
Jastar merekesine arnalǵan onkúndik aıasynda óńir jastarynyń basyn qosqan qoǵamdyq, mádenı, sporttyq, shyǵarmashylyq jáne tanymdyq baǵyttaǵy túrli is-sharalar uıymdastyryldy.
Basty nazar jastardyń belsendiligin arttyrýǵa, azamattyq jaýapkershiligin nyǵaıtýǵa jáne olardyń shyǵarmashylyq áleýetin damytýǵa baǵyttaldy.
Sonymen qatar, «Taza Qazaqstan», «Zań men tártip», «Adal azamat» qaǵıdattaryn nasıhattaýǵa arnalǵan mazmundy kezdesýler men túrli aktsııalar, ıntellektýaldyq oıyndar, pikirtalas alańdary jáne shyǵarmashylyq jobalar ótkizildi.
Atalǵan bastamalar jastardyń bos ýaqytyn tıimdi uıymdastyrýmen qatar, olardyń qoǵamdyq ómirge belsendi aralasýyna, jańa ıdeıalary men bastamalaryn júzege asyrýyna múmkindik berdi.
Kesh barysynda jergilikti ónerpazdarmen qatar, qazaq estradasynyń tanymal juldyzdary MYNBAY, Qaırat Túntekov jáne Dosbol Nurylla óner kórsetip, kópshilikke tanymal ánderin oryndady. Tanymal oryndaýshylardyń óneri merekelik keshtiń ajaryn ashyp, jastarǵa kóterińki kóńil kúı syılady.
Osylaısha, Halyqaralyq jastar kúnine arnalǵan onkúndik Qyzylordadaǵy aýqymdy «Jastarmen birge!» Open Air kontsertimen qorytyndylanyp, jas býynnyń jalyndy úni men shyǵarmashylyq qýatyn, belsendiligi men kóterińki kóńil kúıin toǵystyrǵan jarqyn merekege aınaldy.
