Qyzylordada jastar baǵdarlamasymen jumysqa tartylǵan 2 360 mamanǵa jalaqy tólenbeı kelgen

QYZYLORDA. KAZINFORM – Qyzylorda oblystyq prokýratýrasy jyl basynan beri 7145 jumysshynyń quqyǵyn, onyń ishinde 6342 adamnyń konstıtýtsııalyq quqyǵyn qorǵady.

6 jumys berýshi ákimshilik, 6 adam tártiptik jaýapkershilikke tartylǵan. 

- Qadaǵalaý aktisi negizinde 601,3 mln teńge jalaqy óndirildi. Mysaly, «Jastar praktıkasy» baǵdarlamasy aıasynda jumyspen qamtylǵan 2360 jasqa 264 mln teńge jalaqy qaryzy tólendi, - dedi Rızabek Ojarov. 

Qadaǵalaýshy organ eńbekti qorǵaý jáne eńbek qaýipsizdigi boıynsha da kemshilikter tapty.

Oblystaǵy 8 myńnan astam jumys berýshi jumysshylaryn jazataıym oqıǵalardan mindetti túrde saqtandyrý týraly shart jasamaǵan. Onyń arasynda kúrish ósirý salasyndaǵy irgeli qurylym — «Abzal jáne K» seriktestigi de bar. Kompanııa 511 adamǵa baılanysty shart jasamaǵan. Kemshilikter boıynsha qadaǵalaý aktisi engizilip, nátıjesinde 55 jumys berýshi 500-den astam jumysshysyn jazataıym oqıǵadan saqtandyrdy. 

Oblystyq prokýratýra osyǵan deıin Qyzylordada issapar shyǵynyn óz shotyna aýdarǵan bas esepshiler tergelip jatqanyn málimdedi.