Qyzylordada jasóspirimniń ólimine qatysty qylmystyq is qozǵaldy
QYZYLORDA. KAZINFORM – Qyzylorda qalasynda jasóspirimder arasyndaǵy janjal ólimmen aıaqtaldy. Bul týraly Nuraıym Qaıratqyzy esimdi Threads qoldanýshysy áleýmettik jelidegi jeke paraqshasynda jazdy.
Onyń aıtýynsha, qaıǵyly jáıt 21 qazan kúni bolǵan.
- Bul oqıǵa bizdiń otbasymyzdy orny tolmas qasiretke dýshar etti. Meniń inimdi óz anasynyń kóz aldynda júrek tusynan pyshaqtap, ómirin qıdy. Іnim aýrýhanaǵa jetpeı, sol jerde kóz jumdy. Óz balasynyń anasynyń kóz aldynda osyndaı jaǵdaıǵa tap bolýy – eshbir sózben aıtyp jetkize almaıtyn aýyr qasiret, - dedi ol.
Qylmystyń bolǵanyn oblystyq polıtsııa departamenti rastady.
- Kámeletke tolmaǵannyń abaısyzda ólimine ákep soqqan qasaqana aýyr dene jaraqatyn keltirý deregi boıynsha qylmystyq is qozǵaldy. Kámeletke tolmaǵan kúdikti oblystyq kámeletke tolmaǵandardy beıimdeý ortalyǵyna ornalastyryldy. Sondaı-aq tergeý aıasynda kámeletke tolmaǵan adamdy tárbıeleý jónindegi mindetterdi oryndamaý deregi boıynsha qylmystyq is tirkeldi, - delingen resmı habarlamada.
Departament basshylyǵy tergeý barysyn erekshe baqylaýǵa aldy. Qazaqstan Respýblıkasy Qylmystyq-protsestik kodekstiń 201-babyna sáıkes ózge aqparat qupııa saqtalady.
Marqumnyń týystary istiń barlyq mán-jaıy tolyq zerttelip, oǵan qatysy bar árbir adamnyń áreketine zań aıasynda ádil baǵa berilýin talap etti.
- Qazaqstan Respýblıkasynyń quqyq qorǵaý organdarynan, prokýratýradan jáne tıisti memlekettik organdardan osy isti erekshe baqylaýǵa alyp, ádil ári jan-jaqty tergeý júrgizýdi suraımyz. Іske qatysy bar barlyq adamnyń kinási anyqtalyp, eshkim jaýapkershilikten tys qalmasyn, - dep jazdy jábirlenýshi tarap.
Eske salaıyq, jýyrda almatylyq áıel ulyna bir top jasóspirimniń álimjettik kórsetkenine shaǵymdandy.
