Qyzylordada jasóspirim neden qaıtys boldy
QYZYLORDA. KAZINFORM — Qyzylorda qalasyna qarasty Belkól kentinde jasóspirimniń qaıtys bolýyna baılanysty oblystyq bilim basqarmasynyń basshysy túsinikteme berdi.
12 aqpan kúni Qyzylorda qalasy Belkól kentindegi medıtsınalyq ambýlatorııaǵa 2008 jyly dúnıege kelgen jasóspirimniń máıiti jetkizilgen.
Oqıǵanyń mán-jaıyna baılanysty oblystyq bilim basqarmasynyń basshysy Asqarbek Esjanov tómendegishe túsinikteme berdi.
«Qyzylorda qalasyna qarasty Belkól kentinde 12 aqpan kúni túski saǵat 14.00 shamasynda qaıǵyly jaǵdaı tirkeldi. Kenttegi medıtsınalyq mekemege jetkizilgen № 189 mekteptiń toǵyzynshy synyp oqýshysy qaıtys boldy. Aldyn ala tergeý júrgizilip jatyr. Málim bolǵany, balalar arasynda kelispeýshilik týyndaǵan. Oqıǵa kópqabatty úıdiń podeziniń aldynda bolǵan. Qasynda bolǵan úsh bala ony kenttegi medıtsınalyq mekemege jetkizgen. Tergeý amaldary negizinde qaıtys bolǵan balanyń densaýlyq jaǵdaıyna baılanysty málimetter anyqtalady», — dedi Asqarbek Esjanov.
Osyǵan oraı oblys ákiminiń arnaıy tapsyrmasymen oblys ákiminiń orynbasary, qala ákimi, oblystyq bilim basqarmasynyń basshysy qaıtys bolǵan balanyń otbasyna bardy.
«Biz, bilim salasynyń mamandary árbir balanyń ómirine jaýaptymyz. Qaıǵyly oqıǵadan keıin tárbıe jumysyn álsiretkeni úshin mektep dırektory, tárbıe isi jónindegi orynbasary qyzmetinen ketti. Oblys basshylyǵy tarapynan keıingi eki jylda balalardyń tárbıe máselesine baılanysty qatań mán berilip keledi. Keńeıtilgen deńgeıde jınalystar ótkizildi. Semınarlar, oqýlar uıymdastyrylýda. Bilim salasyndaǵy tárbıe jumystaryn odan ári kúsheıtemiz», — dep tolyqtyrdy basqarma basshysy.
