Qyzylordada jaryqtyń jańa tarıfi bekitildi
QYZYLORDA. KAZINFORM — Qyzylorda elektr taratý toraptary kompanııasy 25 qazannan bastap jańa tarıf bekitilgenin málimdedi.
Elektr energııasyn bólshek saýdada ótkizý boıynsha tutyný kólemi men tutynýshylardyń tobyna qaraı saralanǵan baǵa qoldanysqa engizilmek.
— Shekti baǵa qosymsha qun salyǵynsyz 35,17 teńge, qosymsha qun salyǵymen 40,7972 teńge bolyp belgilendi. Ol arnaıy ekonomıkalyq jáne ındýstrııalyq aımaqtar aýmaǵynda ornalasqan tutynýshylarǵa, áleýmettik mańyzy bar azyq-túlik taýarlaryn óndirýshilerge de qoldanylady. Jeke tulǵalar, onyń ishinde elektr energııasyn taýar, jumys óndirýge nemese satýǵa, qyzmet kórsetýge qatysty emes, óziniń turmystyq qajettiligi úshin paıdalanatyn turmystyq tutynýshylar úshin shekti baǵa — qosymsha qun salyǵynsyz 28,02 teńge, qosymsha qun salyǵymen 32,5032 teńge, — delingen kompanııa taratqan habarlamada.
Tólem mólsheri turmystyq tutynýshylar, ıaǵnı jeke tulǵalar úshin elektr plıtasyn paıdalanatyndar jáne paıdalanbaıtyndar bolyp jikteledi. Jasy boıynsha jalǵyz turatyn zeınetkerler, múgedekter, ekinshi dúnıejúzilik soǵys qatysýshylary men olarǵa teńestirilgender úshin (menshiginde bireýden artyq turǵyn úıi bar azamattardy qospaǵanda) jeńildikter qarastyrylǵan.
Eske salaıyq, jýyrda Shymkentte jylytý maýsymy qarsańynda jylýmen jabdyqtaý tarıfteri qaıta qaraldy. Ózgerister zańdy tulǵalar men kásiporyndarǵa qatysty boldy. Al turǵyndar úshin jylý tarıfteri burynǵy deńgeıde qaldy.
