Qyzylordada janýar tistegen 1,5 myńnan astam adam dárigerge júgindi

KAZINFORM. QYZYLORDA — Osy jyldyń 9 aıynda Qyzylorda oblysynda janýarlardyń tisteýinen, tyrnap, silekeılenýinen zardap shekken 1598 adam dárigerge qaralǵan. Bul týraly oblystyq sanıtarııalyq-epıdemıologııalyq baqylaý departamentinen habarlady.

Bul ótken jyldyń esepti kezeńindegi kórsetkishten joǵary. Mamandar munyń sebebin adamdardyń óz densaýlyǵyna jaýaptylyqpen qaraýymen baılanystyrady.

— Oblys aýmaǵy asa qaýipti qutyrma aýrýynyń tabıǵı oshaǵynda ornalasqan. Alaıda bıyl adamdar arasynda bul qaýipti aýrý tirkelgen joq. Degenmen ótken jylmen salystyrǵanda medıtsınalyq kómekke júginýshiler sany boıynsha dınamıka joǵarylap otyr. Óıtkeni júıeli júrgizilgen sanıtarııalyq aǵartý jumystarynyń arqasynda turǵyndar qutyrma aýrýynyń qaýiptiligin túsindi. Odan qalaı saqtaný keregin de biledi. Janýardan jaraqat alǵan kezde burynǵydaı densaýlyqqa beıjaı qaramaıdy, — dedi departament basshysynyń orynbasary Álııa Ábdiqaıymova.

Zardap shekkenderdiń 75,5%-y ıtten, mysyqtan — 20,7% jáne basqa janýarlardan — 3,8.

— Jaraqattanýshylardyń 4 kún ishinde medıtsınalyq kómekke júginý kórsetkishi 98% boldy. Sonyń 2,6%-y medıtsınalyq kórsetkishterine sáıkes aýrýhanalarǵa jatyp em aldy. 49-%-y shartty 50,6%-y shartsyz kýrs boıynsha qutyrmaǵa qarsy antırabıkalyq ekpemen qamtyldy. Qutyrma aýrýynyń arnaıy emi joq, biraq aldyn alý óte mańyzdy. Sondyqtan janýarlardyń tisteýi nemese tyrnaýy kezinde zardap shekken adamǵa dereý medıtsınalyq kómekke júginip, qutyrmaǵa qarsy antırabıkalyq ekpe alýy qajettigin eske salamyz, — dedi departament ókili.

Mamandar qutyrma aýrýynyń ınkýbatsııalyq kezeńine mán berýdi surady. Onyń uzaqtyǵy, ıaǵnı adamda aýrýdyń alǵashqy belgileri paıda bolǵanǵa deıin 10-nan 90 kúnge deıin, keıde 1 jyldan astam ýaqytqa sozylady.

Eske salsaq, jaqynda Qostanaı oblysynyń Sarykól aýdanynda jeke úı aýlasyndaǵy ıtten qutyrma deregi tirkeldi.