Jańaqorǵanda sý taratý stantsııasy iske qosyldy
QYZYLORDA. KAZINFORM — Oblys ákimi Murat Ergeshbaev Jańaqorǵan kenti «MAI beketi» shaǵyn aýdanyndaǵy sý taratý stantsııasyn jáne qosylý tarmaǵyn paıdalanýǵa berý rásimine qatysty.
Saltanatty sharada aımaq basshysy aýdan turǵyndaryn kópten kútken ıgiliktiń iske asýymen quttyqtady.
— Memleket basshysynyń tapsyrmasymen, Bas prokýratýranyń uıymdastyrýymen 2025-2026 jyldary memleketke qaıtarylǵan aktıvter esebinen óńirimizge 45 mlrd teńge qarjy bólinip, 31 joba iske asty. Onyń ishinde Jańaqorǵan kentindegi sý taratý stantsııasyn salýǵa 1,1 mlrd teńge qarjy bólinip, jumys tolyq aıaqtaldy. Nátıjesinde, 1500-ge jýyq úı sapaly aýyzsýmen qamtylyp, turǵyndar qýanyshqa kenelip jatyr. Memleket basshysyna, Bas prokýratýraǵa aımaǵymyzdaǵy aýqymdy áleýmettik jáne ınfraqurylymdyq jobalardyń júzege asýyna qoldaý kórsetkeni úshin Syr jurtshylyǵy atynan alǵysymdy bildiremin, — dedi Murat Nálqojauly.
Sharada oblys prokýrory Rızabek Ojarov, Jańaqorǵan kenti ardagerler keńesiniń tóraǵasy Serhoja Ydyrysov sóz sóılep, aýdannyń áleýmettik-ekonomıkalyq damýyna úles qosqan jáne sý taratý stantsııasy qurylysyn sapaly júrgizgen merdiger mekeme ókilderi oblys ákiminiń Alǵys hatymen marapattaldy.
Sońǵy tórt jylda Prezıdenttiń, Úkimettiń erekshe qoldaýymen óńir bıýdjeti 809 mlrd teńge bolyp, eki ese ósti. Al damý bıýdjeti 4,3 ese artty.
Bul qarajat aımaqtyń eń ózekti máselelerin sheshýge, aýqymdy ınfraqurylymdyq jobalardy iske asyrýǵa, turǵyndardyń ómir súrý sapasyn jaqsartýǵa baǵyttaldy.
Búginde oblys turǵyndary 100 paıyz ortalyqtandyrylǵan sapaly aýyzsýmen qamtylǵan. Jyl sońyna deıin 10 eldi meken gazdandyrylyp, qamtý deńgeıi 85 paıyz bolady.
Budan bólek, úı kezeginde turǵan azamattardy baspanamen qamtý maqsatynda 6 200-den astam páter berý josparlanýda. Oblys boıynsha 141 shaqyrym avtomobıl joldary, kósheler men kópir ótkelderi jóndeýden ótkizilip, jaqsy jaǵdaıdaǵy joldardyń úlesi 95,5 paıyzǵa jetkiziledi.
