Qyzylordada jańadan taǵaıyndalǵan sýdıalar ant qabyldady

QYZYLORDA. KAZINFORM — Qyzylorda oblystyq sotynyń tóraǵasy Ádilhady Shyǵambaev 2026 jylǵy 2 naýryzdaǵy Prezıdent Jarlyǵyn sot ujymyna tanystyrdy. Bul týraly oblystyq sottyń baspasóz qyzmeti habarlady.

Jarlyq boıynsha Qyzylorda oblysynyń mamandandyrylǵan aýdanaralyq ekonomıkalyq sotynyń sýdıalary bolyp Rınat Begimbaev jáne Aınur Qaıbaldıeva, Qyzylorda qalalyq sotynyń sýdıasy bolyp Nurgúl Júnisova taǵaıyndaldy. 

— Begimbaev Rınat Maratuly ár jyldary túrli mekemede zańger, zań bóliminiń basshysy, dırektor qyzmetterin atqarǵan. 2025 jyldan bastap qazirgi ýaqytqa deıin Túrkistan-Qyzylorda óńiraralyq zań konsýltanttary palatasynda zań konsýltanty bolǵan. Aınur Qaıbaldıeva sot júıesinde 2001 jyldan bastap eńbek etip keledi. Ár jyldary sot otyrysynyń hatshysy, jetekshi maman, bas maman, qeńse meńgerýshisi boldy. 2023 jyldan bastap qazirgi ýaqytqa deıin sot ákimshiliginiń Qyzylorda oblysy boıynsha departamentiniń uıymdastyrý-taldaý bóliminde bas maman qyzmetin atqarǵan. Nurgúl Júnisova sot júıesindegi eńbek jolyn 2013 jyly bastaǵan. Ár jyldary jetekshi maman, bas maman-sot májilisiniń hatshysy, bas maman qyzmetterin atqaryp, 2023 jyldan beri qylmystyq ister jónindegi mamandandyrylǵan aýdanaralyq áskerı soty ákimshisin basqarǵan, — delingen habarlamada.

Shara barysynda jańadan taǵaıyndalǵan sýdıalar Qazaqstan Respýblıkasy Sýdıalarynyń antyn qabyldady. 

Buǵan deıin Joǵary sot keńesiniń kezekti otyrysy ótip, keńes janyndaǵy komıssııalar men sot jıýrıiniń 2025 jylǵy jumys qorytyndylary, sondaı-aq sot júıesin kadrlyq qamtamasyz etý máseleleri qaralǵan bolatyn.