Qyzylordada jańadan qurylǵan eki basqarmaǵa basshy taǵaıyndaldy
QYZYLORDA. KAZINFORM – Búgin Qyzylordada oblys ákimi Murat Ergeshbaevtyń tóraǵalyǵymen ótken májiliste birqatar qurylymnyń jańa basshylary tanystyryldy.
Qos basqarma jańadan qurylyp, basshylary taǵaıyndaldy. Atap aıtqanda, oblystyq týrızm basqarmasynyń basshylyq tizginin Ermekov Dinmuhamed Jandarbekuly qolǵa aldy.
Dinmuhamed Jandarbekuly 1992 jyly Almaty oblysynda dúnıege kelgen. Ál Farabı atyndaǵy Qazaq ulttyq ýnıversıtetinde quqyqtaný jáne qarjy mamandyqtary boıynsha bilim alǵan. Shveıtsarııa bıznes mektebiniń iskerlik ákimshilik doktory.
Ár jyldary Investıtsııalar jáne damý, Ulttyq ekonomıka, Qorǵanys jáne aeroǵarysh ónerkásibi mınıstrlikterinde, Premer-mınıstr keńsesinde, Prezıdent Ákimshiliginde jaýapty qyzmetter atqarǵan.
2023-2025 jyldary Qyzylorda qalasy ákiminiń orynbasary, oblystyq din isteri basqarmasynyń basshysy bolǵan.
2025 jyldan búgingi kúnge deıin oblys ákimi apparaty basshysynyń orynbasary laýazymyn atqaryp keldi.
Oblystyq balalar quqyqtaryn qorǵaý basqarmasy da búgin jumysyn bastap, basshysy laýazymyna Bákirov Erlan Ámirhanuly taǵaıyndaldy.
Ol 1984 jyly Qyzylorda qalasynda dúnıege kelgen. Qazaq gýmanıtarlyq zań ýnıversıtetinde zańtaný, «Bolashaq» ýnıversıtetinde ekonomıka jáne qurylys mamandyqtary boıynsha bilim alǵan.
Ár jyldary Qyzylorda oblysy ákimi apparaty kadr jumysy bóliminiń basshysy, oblystyq jumyldyrý daıyndyǵy basqarmasy basshysynyń orynbasary, Jalaǵash aýdany ákiminiń orynbasary bolǵan.
2021 jyldan búgingi kúnge deıin Qyzylorda oblysy ákimi apparaty basshysynyń orynbasary qyzmetin atqardy.
Buǵan deıin QR Qarjylyq monıtorıng agenttigi tóraǵasynyń buıryǵymen Qyzylorda oblysy boıynsha ekonomıkalyq tergep-tekserý departamentiniń basshysy laýazymyna taǵaıyndalǵan Kenesary Baǵbanuly tanystyryldy.
