Qyzylordada jańa stadıonnyń irgetasy qalandy
QYZYLORDA. KAZINFORM – Qyzylorda oblysynda halyqaralyq talaptarǵa saı keletin jańa stadıonnyń irgetasy qalandy.
Búgin oblys ákimi Nurlybek Nálibaev Qyzylorda qalasynyń sol jaǵalaýyna salynatyn jańa stadıonnyń irgetasyn qalaý rásimine qatysyp, qala turǵyndaryn Qazaqstan halqynyń birligi kúnimen jáne qurylystyń bastalýymen quttyqtady.
«Prezıdentimiz Qasym-Jomart Kemeluly «Bárimiz – bir eldiń azamatymyz. Tarıh toǵystyrǵan taǵdyrymyz – bir, senimmen qadam basatyn keleshegimiz – bir. Biz birtutas ult retinde árdaıym babalar amanatyna adal bolamyz. Qasıetti qara shańyraǵymyz – Qazaqstannyń jarqyn bolashaǵyn birge jasaımyz. Bizdiń maqsatymyz aıqyn, bul – Ádiletti Qazaqstandy qurý» degen bolatyn. Búgin – aımaǵymyz úshin aıtýly kún, kópten kútken qýanyshty sátte bas qosýdamyz. Mereke kúni ózderińizben birge halyqaralyq talaptarǵa saı keletin, 10 myń oryndyq jańa stadıonnyń irgetasyn qalaımyz. Táýelsizdik jyldarynda elimizde zamanaýı eki stadıon, ıaǵnı «Astana arena» men «Túrkistan arena» ǵana salynǵan. Qyzylordadaǵy Ǵanı Muratbaev atyndaǵy ortalyq stadıonnyń salynǵanyna 60 jylǵa jýyqtady. Stadıon ÝEFA talaptaryna sáıkes kelmeıdi. Sondyqtan, bizdiń súıikti komandamyz «Qaısardyń» jankúıerleriniń usynysymen jańa stadıon salýǵa sheshim qabyldadyq. Barshamyzǵa qutty bolǵaı!», – dedi aımaq basshysy.
Іs-sharada fýtboldan Qazaqstan qurama komandasynyń kapıtany, bes dúrkin el chempıony jáne Qazaqstan kýbogynyń jeńimpazy, eki dúrkin Qazaqstan kýbogynyń ıegeri Ashat Taǵybergen jerlesterin quttyqtady. Jańa stadıonnyń irgetasyn qalaý sátinde sport memleket jáne qoǵam qaıratkeri Baqbergen Dosmanbetov bata berdi.
Aıta keteıik, bıyl Syr óńirinde jaǵymdy jańalyqtar men jarqyn jetistikter jeterlik. Qyzylorda qalasynda quny 2 mlrd 700 mln teńge bolatyn ústel tennısi ortalyǵynyń qurylysy qarqyndy júrýde. Syrdarııa ózeniniń sol jaǵalaýynan fızıka-matematıka mektep-ınternaty, Oqýshylar saraıy jáne mýzykalyq kolledjdiń jańa ǵımaraty salynýda. Halyqaralyq standarttarǵa saı keletin jabyq basseıni bar kópsalaly dene shynyqtyrý-saýyqtyrý kesheniniń qurylysy bastaldy.
Ótken jyly aımaǵymyzda 7 dene shynyqtyrý-saýyqtyrý kesheni el ıgiligine tasbystalsa, bıyl aýdandarda 4,7 mlrd. teńgege 12 sport keshenin paıdalanýǵa berý josparlanýda.
Jyl basynan beri Syr sportshylary álemdik arenalarda oıyn kórsetti. Sportshylar oblys qorjynyna 6 medal salsa, respýblıkalyq chempıonattar men kýboktardan 140 júlde ıelendi. Basty jetistik, Qamshybek Qońqabaev boks, Aıdos Sultanǵalı grek-rım kúresinen Parıj olımpıadasyna, qos birdeı sportshy Erık Qasqabaev pen Shyńǵys Medeýov otyryp oınaý voleıbolynan paralımpıadaǵa joldama aldy. Dzıýdo, paradzıýdodan da úmitkerler bar.
