Qyzylordada jalǵan aqshamen saýda jasaǵan turǵyn bas bostandyǵynan aıyryldy

Qyzylorda qalalyq №2 soty jalǵan aqshany saqtap, ony birneshe ret ótkizgen jergilikti turǵynǵa qatysty úkim shyǵardy, dep habarlaıdy Kazinform.

Qyzylorda qalasynyń №2 sotynda jalǵan aqshany saqtap, birneshe ret ótkizgen sottalýshyǵa qatysty qylmystyq is qaraldy.

«Ol tanystarymen áńgimelesý barysynda olardyń qolynda 2 býma 20 myń teńgelik jalǵan aqsha bar ekenin biledi. Osydan keıin jalǵan banknottardy ótkizý nıeti týyndaıdy. Tanysyna óziniń qylmystyq oıyn aıtyp, odan 2 dana banknotty surap alǵan. Sodan keıin óziniń basqarýyndaǵy avtokóligimen gaz quıý beketine keledi. Qolyndaǵy aqshanyń 2500 teńgesine gaz quıdyryp, olarmen jalǵan 20 myń teńgelik jalǵan aqshamen eseptesedi. Qalǵan 17,5 myń teńge QR Ulttyq bankiniń túpnusqalyq aqshasyn qaıtarym retinde alyp, oqıǵa ornynan boı tasalaǵan. Odan keıin taǵy da tanysynan 20 myń teńgelik banknotty ótkizý maqsatynda surap alyp, oǵan motor maıyn satatyn dúkennen qajetti zatyn alýǵa áreket etken. Qalǵan 11500 teńge QR Ulttyq bankiniń túpnusqalyq aqshasyn qaıtarym retinde almaqshy bolǵanda, satýshy aqshanyń shynaıylyǵyna kúmándanyp polıtsııa qyzmetkerlerin shaqyrǵan», - dep málim etti Qyzylorda qalasynyń №2 sotynan.

Sot úkimimen ol QR Qylmystyq kodeksiniń 231-babynyń 2-bóliginiń 2) tarmaǵymen kináli dep tanyldy. Oǵan 5 jyl merzimge bas bostandyǵynan aıyrý jazasy taǵaıyndaldy. Sot úkimi zańdy kúshine engen.

Eske salsaq, bıyl Qyzylorda oblysynda zańsyz aınalymnan 122 qarý tárkilendi.