Qyzylordada jalaqy bereshegi qordalanǵan jeke mektepter isi sotqa jetti

Memlekettik eńbek ınspektsııasy komıteti Qyzylorda oblysy boıynsha departamentiniń basshysy Bektemir Jumaǵulov málimdegendeı, «Ańsar Káýsar» jáne «Mansap» mektepterinde osyndaı kúrdeli másele qalyptasqan. 

- Oblys ákiminiń sheshimimen «Mansap» mektebindegi jumysshylar ótken jyldyń sońynda ashylǵan «Keleshek» mektebine aýystyryldy. Qaryzy áli jetkilikti. «Ańsar-Káýsar» mektebiniń 58 jumysshyǵa 38 mln teńge jalaqy bereshegi bar. Bul – qyrkúıek, qazan, qarasha aılarynyń tolyq jáne jeltoqsan aıynyń ishinara jalaqysy. Oblys ákimi tarapynan bizge tapsyrma berildi. Qyzmetkerler shaǵymdanǵannan keıin mektepti mekenjaıyna baryp tekserdik. Qazirgi kúni is sotta qaralyp jatyr. Sot birqatar muǵalim men jumysshyǵa jalaqy tóleý jóninde sheshim shyǵardy. Odan ári jumys berýshi tóleýge mindetti. Tólemegen jaǵdaıda ár qyzmetker jeke-dara sotqa talap aryzben júginýge quqyly, - dedi ol. 

Kazinform tilshisi oblystyń bas memlekettik eńbek ınspektorynan jeke bilim ordalarynda qyzmetkerlerdi aqysyn tólemesten eńbek demalysyna jiberýdiń zańdylyǵyn surap bildi.

- Eńbek demalysyn da, jalaqysyn da, eńbekke jaramsyzdyq jónindegi qarajatty tóleýge de mindetti. Oblystaǵy keıbir iri kásiporyndar básekelestik ortaǵa jibergen sııaqty qarjyny únemdeý maqsatynda sanıtarlyq tazalyqshy, kólik júrgizýshileri sııaqty jumysshylardy qarjylyq múmkindigine qaraı aýtsorsıngke jiberedi. Ol qyzmetkerlerden de «bizge eńbek demalysyn bermedi, eńbekke jaramsyzdyq jaǵdaıynda aqymyzdy tólemedi» degendeı aryz-shaǵym túsip jatady. Qaıtalap aıtamyn, zań bárine ortaq, - dedi Bektemir Jumaǵulov. 

Buryn biz budan bylaı jeke mektepter tek naqty qajettilik týyndaǵan óńirlerde ǵana ashylatynyn jazǵan edik.