Qyzylordada zańsyz ustalǵan 14 adam ýaqytsha ustaý ızolıatorynan bosatyldy
QYZYLORDA. KAZINFORM — Qyzylorda oblystyq prokýratýrasynyń esebinshe, bıyl 6 aıda óńirde qylmys deńgeıi 10%-ǵa tómendedi.
Qylmystyń aldyn alý — prokýratýra qyzmetindegi negizgi basymdyqtardyń biri. Osy maqsatta qylmys jasaýǵa beıim jáne buryn sottalǵan azamattarmen profılaktıkalyq jumys kúsheıdi.
— Mobıldi toptar esepte turǵan 1500-den astam azamattyń turǵylyqty jeri men jumys oryndaryn tekserip, olardyń qaıta qylmys jasaýyna jol bermeý baǵytynda naqty sharalar qabyldady. Sonyń nátıjesinde asa aýyr qylmys 5%-ǵa, qorqytyp alý 80%-ǵa, urlyq 34%-ǵa, mal urlyǵy 36%-ǵa jáne buzaqylyq 48%-ǵa azaıdy, — delingen habarlamada.
Qadaǵalaýshy organ jumysyndaǵy taǵy bir mańyzdy baǵyt — azamattardyń konstıtýtsııalyq quqyǵy men bostandyǵyn qorǵaý.
— Azamattardyń quqyǵyn zańsyz shekteýge jol bermeý maqsatynda prokýrorlar qylmystyq qýdalaý organdarynyń quqyqqa tikeleı áser etetin 38 sheshimimen kelisýden bas tartty. Zańsyz ustalǵan 14 adam prokýrordyń qaýlysymen ýaqytsha ustaý ızolıatorynan bosatyldy, — dep habarlady oblystyq prokýratýra.
Tergeý sapasyn arttyrý maqsatynda berilgen nusqaý men usynystar nátıjesinde 310 qyzmetker tártiptik jaýapkershilikke tartyldy. 37 adamnyń is-áreketin saralaý týraly qaýlylarǵa kelisim berilgen joq. Dáleldiń jetkiliksizdigine baılanysty 16 qylmystyq is aqtaý negizinde toqtatyldy.
Eske salaıyq, bıyl 6 aıda Qyzylorda oblysynda 35 myń jumysshynyń quqyǵy, onyń ishinde 9,5 myń jumysshynyń konstıtýtsııalyq quqyǵy qorǵaldy.
