Qyzylordada zańsyz oıyn bıznesin uıymdastyrǵan bes adam sottaldy

QYZYLORDA. KAZINFORM — Qyzylordada zańsyz oıyn bıznesin uıymdastyrǵan bes adam sottaldy. Olar oqyrman sany kóp áleýmettik paraqshany satyp alý arqyly zańsyz qumar oıynyn ótkizgen. 

Qyzylorda jáne Ulytaý oblysynda turatyn bes adam qylmystyq pıǵylyn bıylǵy jyldyń qańtar aıynda bastaǵan. Olar «Instagram» áleýmettik jelisindegi 402 myń oqyrmany bar paraqshany satyp alǵan.

— Sol arqyly «Karta-Loto» zańsyz qumar oıyn uıymdastyrǵan. Sondaı-aq, «WhatsApp» áleýmettik jelisinde sottalýshylar zańsyz qumar oıynyn júıeli túrde júrgizgen. Jelide olardy respýblıkanyń ózge óńirlerindegi oqyrmandar da baqylap otyrǵan. Azamattardyń qyzyǵýshylyǵyn arttyrý maqsatynda halyqty túrli jarnama arqyly oıynǵa shaqyrǵan. Saldarynan bıylǵy jyldyń qańtar-shilde aılary aralyǵynda olar 69 822 994 teńgeden astam tabys tapqan. Sottyń úkimimen sottalýshylarǵa 2 jyl 6 aı men 3 jyl 6 aıǵa bas bostandyǵyn shekteý jazasy taǵaıyndaldy, — dep málim etti Qyzylorda oblysy boıynsha Ekonomıkalyq tergep-tekserý departamentinen.

Eske salsaq, budan buryn Qyzylordada qarjy pıramıdasyn qurǵan azamatsha 5 jylǵa sottaldy.