Qyzylordada zańsyz altyn óndirgen qylmystyq top ustaldy
ASTANA. KAZINFORM – Qarjylyq monıtorıng agenttiginiń Qyzylorda oblysy boıynsha departamenti prokýratýranyń úılestirýimen jáne Ulttyq qaýipsizdik komıteti departamentimen birlesip, Shıeli aýdanynda baǵaly metaldardy zańsyz óndirýmen aınalysqan qylmystyq toptyń áreketin toqtatty.
Tergeý málimetinshe, Jamankól shatqalynda kúrdeli óndiristik óńdeýdi qajet etpeıtin tabıǵı altyn zańsyz óndirilgen.
Qylmystyq top músheleriniń mindetteri naqty bólingen. Biri altyn izdeýshilerdi tartyp, óndirý jumystaryn uıymdastyrsa, endi biri altyndy tasymaldaý men satýǵa jaýap bergen. Qalǵandary qaýipsizdikti qamtamasyz etip otyrǵan.
«Zańsyz áreketti jasyrý úshin aýmaqtyń aınalasyna baqylaýshylar qoıylyp, mototsıkl mingen adamdar mańaıdy torýyldaǵan. Olar bógde adamdardyń nemese memlekettik organdar qyzmetkerleriniń kelgenin aldyn ala eskertip otyrǵan. Óndirilgen altyn Almaty qalasyna jetkizilip, satýdan túsken qarajat top músheleriniń arasynda bólingen», – dep málimdedi agenttik.
Tintý barysynda quramynda altyny bar 500 gramnan astam shıkizat, eki arnaıy tehnıka, 12 metall izdegish jáne alty avtokólik tárkilendi. Sondaı-aq eki pnevmatıkalyq tapansha men bir tegis uńǵyly myltyq tabyldy.
Qazirgi ýaqytta 13 kúdikti qamaýǵa alynyp, tergeý amaldary jalǵasyp jatyr.
Aıta keteıik, adamdardyń jeke derekterin zańsyz paıdalanyp, 2 mlrd teńge nesıe alǵan qylmystyq top ustaldy.
