Qyzylordada zańǵa baǵynbaǵan taksıster 1 mln 170 myń teńgege jýyq aıyppul tóledi

QYZYLORDA. KAZINFORM – Qyzylorda oblysynyń kóliktik baqylaý ınspektsııasy avtomobıl kóligin baqylaý salasyndaǵy tekserý nátıjesimen tanystyrdy.

Jyldyń alǵashqy jartysynda 422 quqyq buzýshy ákimshilik jaýapkershilikke tartylyp, olarǵa 23,6 mln teńge aıyppul salyndy. 

— Avtomobıl kóligi salasynyń qyzmetin júzege asyrýshylar qyzmetin baqylaý maqsatynda 20 sharýashylyq sýbektisi tekserildi. Onyń ishinde 1 ret jospardan tys tekserý júrgizildi. Nátıjesinde 1 zańdy tulǵa ákimshilik jaýapkershilikke tartylyp, aıyppul tóleýge mindetteldi. Oblysta taksı qyzmetimen aınalysýshylardyń osy saladaǵy normatıvtik-quqyqtyq akt talaptaryn óreskel buzýy tyıylmaı tur. Soǵan baılanysty «Zańsyz tasymaldaýshy» profılaktıkalyq is-sharasyn turaqty túrde ótkip turamyz. Kezekti aktsııa barysynda jolaýshy tasymaldaıtyn 90-nan astam avtokólik tekserildi. Nátıjesinde 16 adam ákimshilik jaýapkershilikke tartylyp, 1 mln 170 myń teńgege jýyq aıyppul óndirdi, — dedi ınspektsııa basshysynyń orynbasary Baqytjan Bekmuratov.

Mamandar Shıeli, Jańaqorǵan aýdandarynan tas tasıtyndarǵa qatysty tekserýdi kúsheıtti. Nátıjesinde zańǵa baǵynbaǵandarǵa qatysty 297 ákimshilik is qozǵaldy. Onyń 57-si artyq salmaqpen júk tasymaldaǵan. Aldaǵy ýaqytta Shymkent-Samara tas joly boıyndaǵy Qyzylorda qalasyna qarasty Birqazan eldi mekeniniń mańyna avtomattandyrylǵan ólsheý stantsııasy ornatylmaq. 

Buǵan deıin habarlaǵanymyzdaı, Qyzylorda oblysynyń Qazaly aýdandyq prokýratýrasy júrgizgen tekseris nátıjesinde mádenıet salasyndaǵy mekemelerde eńbek zańnamasynyń buzylǵany anyqtaldy.