Qyzylordada zamanaýı úlgidegi jańa avtovokzal paıdalanýǵa berildi
QYZYLORDA. KAZINFORM – Qyzylorda qalasynyń sol jaǵalaý bóliginde zamanaýı úlgidegi jańa avtovokzal paıdalanýǵa berildi. Bul is-sharaǵa oblys ákimi Nurlybek Nálibaev, el aǵalary, sala mamandary jáne jergilikti jurtshylyq qatysty.
«Memleket basshysy Qasym-Jomart Kemeluly halyqqa arnaǵan Joldaýynda «Kólik-logıstıka salasy ekonomıkamyzdy alǵa bastaıtyn basty kúshtiń birine aınalýǵa tıis» degen bolatyn. Avtobýstarmen jolaýshy tasymaldaý – úlken suranysqa ıe qyzmet. Jolaýshylar men júk tasymalyn ulǵaıtý, qyzmet sapasyn jaqsartý maqsatynda ótken jyly jańa avtovokzal salý jóninde sheshim qabyldanyp, Syrdyń bas shahary taǵy bir ásem, zamanaýı nysanmen tolyqty. Qurylysshylarymyzdyń qurysh qolynan shyqqan osy ǵımarattan attanǵan jolaýshylardyń joly aq, sapary sátti bolsyn. Aımaq ekonomıkasynyń kirisin eseleıtin kólikter legi tolastamasyn. El men eldiń, aǵaıyn men týystyń arasyn jalǵaıtyn tatýlyqtyń tutqasy, saýda-sattyq pen iskerlik baılanystyń altyn kópiri bolsyn!», - dedi aımaq basshysy.
Іs-sharada Qyzylorda oblysynyń Qurmetti azamaty Aıtbaı Kósherbaev jerlesterin quttyqtady. Sondaı-aq nysan qurylysyn sapaly júrgizýge atsalysqan merdiger mekeme qyzmetkerleri oblys ákiminiń Alǵys hatymen marapattaldy.
Jańa avtovokzal halyqtyń talap-tilegi men suranysyna saı bıýdjet qarjysy esebinen 975 mln. teńgege salyndy. Munda jolaýshylar men júrgizýshilerge, múmkindigi shekteýli azamattarǵa barlyq jaǵdaı qarastyrylǵan. Jolaýshylar avtovokzaldan halyqaralyq jáne túrli baǵyttaǵy 38 marshrýt boıynsha saparǵa shyǵa alady.
Aıta keteıik, keıingi jyldary Syr óńirinde barlyq salanyń materıaldyq-tehnıkalyq bazasyn, onyń ishinde avtoparkin jańartýǵa basymdyq berilýde. Qyzylorda qalasyndaǵy qoǵamdyq kóliktiń máselesin túbegeıli sheshý úshin jańadan 300, mektep oqýshylaryna 30 avtobýs, densaýlyq saqtaý salasyna 70 jedel járdem kóligi, ormanshylarǵa 95 tehnıka, veterınarııa salasynyń mamandaryna 30, quqyq qorǵaý organdaryna 92 qyzmettik avtokólik, tótenshe jaǵdaılar qyzmetine 17 arnaıy tehnıka alyndy.
«Úlgili eldi meken» oblystyq baıqaýynyń jeńimpazdaryna kúndelikti el turmysyna eń qajetti degen zamanaýı úlgidegi 29 arnaıy tehnıka berildi. Bıyl oblys turǵyndarynyń suranysyna sáıkes barlyq eldi mekendegi densaýlyq saqtaý uıymdaryna 200 sanıtarlyq avtokólik satyp alynbaq. Qala turǵyndaryna arzan baǵamen tasymal qyzmetin kórsetetin 100 ekotaksı 1 mlrd teńgege alynýda. Elektr qýatymen júretin kólikter ortaq jeli arqyly jumys jasap, jolaýshylardy dittegen jerine qaýipsiz jetkizedi.
Eske salsaq, ótken jyly «Qazaqstan temir joly» kompanııasynyń jáne jergilikti kásipkerlerdiń demeýshiligimen 600 mln. teńgege jýyq qarjyǵa toǵyz joldyń torabyndaǵy bas qaqpa – temirjol vokzaly kúrdeli jóndeýden ótti. Aýmaǵy abattandyrylyp, jańadan jaryq shamdar ornatyldy. Jaqynda «Qyzylorda-Semeı» baǵytyndaǵy jolaýshylar poıyzyna 44 zamanaýı vagon alynyp, tolyǵymen jańalandy.
«Bolat Ótemuratov» qorynyń qoldaýymen 17 mlrd. teńgege jýyq qarjyǵa «Qorqyt Ata» áýejaıynyń jańa termınaly halyqaralyq talaptarǵa saı etip salyndy. Ǵımarat jaqyn arada paıdalanýǵa beriledi.
Ótken jyly aımaqta 4 108 páterlik 300 turǵyn úıdiń qurylysy júrgizildi. Nátıjesinde 2 400-ge jýyq páter tabystalyp, 11 myńnan astam turǵynnyń baspana máselesi oń sheshimin tapty. Halyqtyń turmys jaǵdaıynyń jaqsarýy, jaıly ómir súrýiniń kepili bolyp sanalatyn baspanamen qamtý jumystary bıyl da qarqyndy júrýde. Bıýdjet qarajaty esebinen 14,3 mlrd teńgege 1890 páterlik 70 turǵyn úı salynady. Onyń 16-sy jeti qabatty bolady.
Búginde Qyzylorda qalasy men eldi mekenderdiń kelbetine kórik qosatyn áleýmettik nysandar qurylysy qarqyn alǵan. Olardyń barlyǵy kópshiliktiń kóńilinen shyǵatyn kórikti ǵımarattar retinde halyqtyń kózaıymyna aınalyp úlgerdi. Sondaı-aq sol jaǵalaýdan 300 oryndyq jataqhanasy bar 400 oryndyq fızıka-matematıka mektep-ınternatynyń qurylysy júrgizilip jatyr.
