Tamyz konferentsııasy: Qyzylordada úzdik ustazdar memlekettik nagradalarmen marapattaldy

Alqaly jıynǵa oblys ákimi Murat Ergeshbaev, Oqý-aǵartý mınıstrliginiń Bilim salasynda sapany qamtamasyz etý komıteti tóraǵasynyń orynbasary Jámılá Esanova, Ǵylym jáne joǵary bilim mınıstriniń keńesshisi Rýslan Emelbaev, oblystyq máslıhat tóraǵasy Murat Tleýmbetov, zııaly qaýym ókilderi, bilim salasynyń ardagerleri men ustazdar qatysty.

Tamyz konferentsııasynda aımaqtyń bilim berý salasyndaǵy jetistikter men mańyzdy bastamalar jan-jaqty talqylandy.

«Jańa oqý jyly qarsańynda aldaǵy damý baǵytyn belgileý óte mańyzdy. Ustazdardyń respýblıkalyq tamyz konferentsııasynda Memleket basshysy Qasym-Jomart Kemeluly: «Ádiletti, Qýatty, Qaýipsiz ári Taza Qazaqstannyń tiregi bolatyn jaýapty ári adal azamattardy tárbıeleý – bárimizdiń ortaq mindetimiz» dep atap ótti.

Prezıdentimiz óz sózinde Qyzylorda oblysynyń mektep bitirýshileri Ulttyq biryńǵaı testileýdiń qorytyndysy boıynsha joǵary kórsetkishke qol jetkizgenin erekshe atap ótti. Túlekterimiz úshinshi jyl qatarynan respýblıkada birinshi orynda. Bul eń aldymen ustazdardyń tabandy eńbegi men memleket qoldaýynyń nátıjesi dep bilemin.

Oblystyń 967 túlegi «Altyn belgi», 1124 túlegi «Úzdik attestat» ıegeri atandy. Bilim alýshylardyń jetistikterin monıtorıngteý nátıjesinde oqýshylarymyz 4-synyptar arasynda respýblıka boıynsha úshinshi, 9-synyptar arasynda ekinshi orynǵa ıe boldy. 
Memleket basshysy aıtqandaı: «Ustaz – ulttyń shamshyraǵy». Osy jaýapty jolda Sizderge zor densaýlyq, sarqylmas kúsh-qýat, shyǵarmashylyq izdenis pen kásibı tabys tileımin. Jańa oqý jyly barshańyzǵa tyń bastamalar men jarqyn jeńister ákelsin!» – dedi aımaq basshysy.

Oblys ákimi jaýapty tulǵalarǵa jasandy ıntellektini bilim berý júıesine engizýde pedagogterdiń tsıfrlyq quzyretin arttyrýdy, oqý protsesinde tıimdi ári qaýipsiz paıdalanýdyń ozyq tájirıbelerin engizýdi, jas muǵalimderdi qoldaý jáne tálimgerlik ınstıtýtyn kúsheıtýdi, balalardyń zańdy múddeleri men qaýipsizdigin qamtamasyz etýdi, áleýmettik osal toptaǵy balalarǵa kómek kórsetýdi jáne sybaılas jemqorlyq táýekelderiniń aldyn alýdy tapsyrdy.

Memleket basshysy Qasym-Jomart Kemelulynyń qatysýymen Astana qalasynda ótken tamyz keńesinde Jalaǵash aýdany Ál-Farabı atyndaǵy №201 mektep-lıtseıiniń muǵalimi Aıgúl Shildebaeva «Qazaqstannyń eńbek sińirgen ustazy» qurmetti ataǵymen marapattalǵan bolatyn. 

Al «Orta bilim beretin úzdik uıym» atalymy boıynsha beriletin 34 mln teńge grantqa Jańaqorǵan aýdany boıynsha bilim bóliminiń № 286 mektep-lıtseıi laıyq dep tanyldy.

Búgingi basqosýda bilim salasynda eseli eńbek etip júrgen ustazdar memlekettik jáne vedomstvolyq nagradalarmen marapattaldy.