Qyzylordada úıler qyzyl kirpishten salyna bere me
QYZYLORDA. KAZINFORM – Qyzylorda qalasynda bir kezderi turǵyn úılerdi biryńǵaı qyzyl kirpishten soǵý sánge aınalǵan bolatyn. Bul úrdis keıin saıabyrsyǵanyn baıqap júrmiz.
Kazinform tilshisiniń «Qyzyl kirpishtiń ornyn ne basady?» degen suraǵyna oblystyq Qurylys, sáýlet jáne qala qurylysy basqarmasynyń basshysy Erlan Tórálıev jaýap berdi.
- Premer-mınıstrdiń birinshi orynbasary Nurlybek Mashbekuly aımaqty basqarǵan tusta qyzyl kirpishti almastyratyn jańa materıal taýyp, sony paıdalaný týraly tapsyrma júktegen bolatyn. Tapsyrmany oryndaý maqsatynda biz fıbrotsementti paneldi qoldanýǵa kóshtik. Óte sapaly materıal. Al qazirgi kezde alıýmınıı kompozıtti paneldi qoldanysqa keńinen engize bastadyq. Kepildik merzimi 25-30 jylǵa deıin barady. Kúnniń ystyǵyn nysannyń ishine jibermeı ustaıdy, salqyn kezde jylý úı nemese ǵımarattyń ishinde saqtalady. Eshqashan shirimeıdi. Aldaǵy ýaqytta jańadan salynatyn turǵyn úılerdiń syrtyn sonymen qaptaý josparlanǵan, - dedi ol.
Basqarma basshysy Qyzylorda qalasynda nelikten záýlim úı-jaılar salynbaıtynyn aıtyp berdi.
- 25 qabatty turǵyn úıdiń sharshy metriniń quny óte qymbat, ekonomıkalyq jaǵynan tıimsiz. Esepteýimizge sáıkes oblys ortalyǵy úshin turǵyn úıler men ǵımarattardy 7, 9, eń árisi 12 qabatty etip salǵan tıimdi. Odan tym bıiktetýge topyraq jaǵdaıy múmkindik bermeıdi, - dedi Erlan Tórálıev.
Aıta keteıik, Qyzylorda qalasyndaǵy úıler men nysandardyń basym kópshiligi bes qabattan aspaıdy.
Buǵan deıin biz úsh jylda Qyzylorda qalasynda 1 mlrd 775 mln teńgege 60 eski kópqabatty turǵyn úıdiń qasbetteri zamanaýı panelmen qaptalǵanyn jazdyq.
