Qyzylordada úı jaǵdaıynda esirtki ósirgen 5 fıtozerthana anyqtaldy

QYZYLORDA. KAZINFORM — Qyzylordalyq polıtseıler bıyl 8 aıda esirtki qylmysyna qarsy is-qımyl júrgizý nátıjesinde 210 quqyqbuzýshylyqty anyqtady.

Onyń basym bóligi esirtkini ósirý, ótkizý jáne jarnamalaýǵa baǵyttalǵan.

Oblystyq polıtsııa departamenti málimdegendeı, zańsyz aınalymnan 1 tonna 315 keli esirtki alyndy. 

— Aımaqta esirtkiniń basqa túrlerine qaraǵanda marıhýana kóbirek ótimdi bolyp tur. Sondaı-aq sıntetıkalyq esirtki zańsyz aınalymǵa engeli geroındi aınalymnan yǵystyrdy. Onyń ınternet jáne áleýmettik jeliler arqyly taralýy uıymdasqan qylmystyq toptardy anyqtaýǵa keri áserin tıgizip otyr, — dedi departamenttiń basqarma bastyǵy Birjan Baǵysov.

Sondaı-aq úı jaǵdaıynda sora ósirgen 5 fıtozerthana anyqtaldy. Maýsym aıynda asa iri mólsherde sıntetıkalyq esirtki tasymaldaǵan Qyzylorda jáne Mańǵystaý oblystarynyń turǵyndary quryqtaldy.

— Jedel profılaktıkalyq is-sharalar nátıjesinde esirtkini jarnamalaıtyn graffıtı sýretter azaıdy. «Kıbernadzor» aqparattyq júıesine sıntetıkalyq esirtkini jarnamalaıtyn 1050 saıt engizilip, buǵattaldy. Profılaktıkalyq is-sharalar ótkizýge jergilikti bıýdjetten 17 mln teńge bólindi, — dedi Baǵysov.

Al jaqynda Almaty oblysynyń 35 jastaǵy turǵyny 2024 jyldyń qazan aıynda jerasty esirtki zerthanasyn uıymdastyrǵany úshin 8 jylǵa bas bostandyǵynan aıyryldy.