Qyzylordada úı kezegindegi turǵyndarǵa 90 páterdiń kilti tabystaldy
QYZYLORDA. KAZINFORM — Búgin oblys ákimi Murat Ergeshbaevtyń qatysýymen sol jaǵalaýdaǵy eki kópqabatty turǵyn úıdiń 90 páteri áleýmettik jaǵynan osal toptaǵy otbasylarǵa tabystaldy.
Saltanatty sharaǵa oblystyq máslıhat tóraǵasy Murat Tileýmbetov, zııaly qaýym ókilderi men el aǵalary jáne qala turǵyndary qatysty.
Aımaq basshysy jańa qonys ıelerin quttyqtap, izgi tilegin jetkizdi.
— Barshańyzǵa kópten kútken jańa qonys qutty bolsyn! Prezıdentimiz Qasym-Jomart Kemeluly: «Qoljetimdi baspana — arman emes, bizdiń azamattarymyzdyń aldyndaǵy mindetimiz», — degen bolatyn. Bul baǵytta Syr óńirinde baıypty bastamalar sátti júzege asýda. Turǵyndardyń ál-aýqatyn arttyrý úshin jaıly baspanamen, áleýmettik nysandarmen qamtý júıeli jolǵa qoıylǵan. Búgin kezekte turǵan jerlesterimizge aýmaǵy 7 myń sharshy metrden asatyn 90 páterdiń kiltin saltanatty túrde tabystaýdamyz. Aldaǵy ýaqytta da shahardyń ajaryn aıshyqtaıtyn zamanaýı úlgidegi turǵyn úıler boı kóteredi. Jańa qonys qutty, shańyraqtaryńyz bıik, bosaǵasy berik bolsyn, ishi bereke men merekege tolsyn! Ár otaýdan búldirshinderdiń kúlkisi estilip, tatýlyq saltanat qura bersin! , — dedi Murat Nálqojauly.
Rásimde el aǵasy Baqbergen Dosmanbetov sóz sóılep, turǵyn úıdi salǵan qurylysshylar oblys ákiminiń Alǵys hatymen marapattaldy.
Memleket basshysynyń, Úkimettiń qoldaýymen sońǵy tórt jylda turǵyn úı kezegindegi azamattarǵa 8 myńǵa jýyq páter berilip, 30 myńnan astam jerlesimiz baspanaly boldy.
2026-2027 jyldary 6200-den astam páter tabystalyp, 25 myńǵa jýyq turǵynnyń baspana máselesin sheshý josparlanyp otyr.
Búginde sol jaǵalaýda boı kótergen 169 nysannyń 136-sy — kópqabatty turǵyn úı. Jańa shaǵyn aýdan turǵyndarynyń sany 25 myńnan asty.
Halyqqa jaıly orta qalyptastyrý maqsatynda 20 áleýmettik, 13 iri bıznes nysany boı túzep, el ıgiligine qyzmet etip jatyr.
Qazirgi ýaqytta taǵy 48 ǵımarat salynyp jatyr. Sondaı-aq I.Toqtybaev kóshesinen sol jaǵalaýǵa ótetin tórt jolaqty jańa kópir qurylysy josparlanǵan.
