Túrkııalyq kompanııa Qyzylordada iri ınvestıtsııalyq jobany bastaıdy
QYZYLORDA. KAZINFORM – Memleket basshysy Qasym-Jomart Toqaev pen Túrkııa Prezıdenti Rejep Taııp Erdoǵannyń qatysýymen ótken Qazaqstan-Túrkııa bıznes forýmy aıasynda Qyzylorda oblysynyń oblys ákimi Murat Ergeshbaev Túrkııanyń «Fabe Agro» kompanııasynyń basshysy Fatıh Býdanmen kezdesti.
Onda «Qyzylorda oblysynda aýyl sharýashylyǵy ónimderin óndirýge arnalǵan jylyjaı keshenin salý» ınvestıtsııalyq jobasyn iske asyrý boıynsha ózara yntymaqtastyq týraly memorandýmǵa qol qoıyldy.
— Memleket basshysynyń Joldaýynan týyndaıtyn strategııalyq mindetterdiń biri — azyq-túlik naryǵynyń ımportqa táýeldiligin barynsha azaıtý. Qyzylorda oblysy — Qazaqstandaǵy kúrish óndiretin óńirlerdiń biri. Elimizdegi kúrish pen tuzdyń 90 paıyzdan astamy bizdiń aımaqta óndiriledi jáne ónimder alys-jaqyn shetelderge eksporttalady.
Óńirdiń klımaty kartop, kókónis, baqsha daqyldary jáne jemis-jıdektiń barlyq túrin ósirýge qolaıly. Maýsymaralyq kezeńde oblys turǵyndaryn jergilikti ári sapaly kókónispen qamtamasyz etý úshin jylyjaı sharýashylyǵyn damytýǵa erekshe kóńil bólinýde.
Eske salaıyq, 2025 jyldyń qyrkúıek aıynda «Fabe Agro» kompanııasynyń ókilderi Qyzylordaǵa keldi. Sol kezdegi aımaq basshysy Nurlybek Mashbekulymen kezdesip, jobany bastaýǵa qatysty kelissózder júrgizildi. Bul joba qazan aıynda Memleket basshysy Qyzylordaǵa jumys saparymen kelgende tanystyrylǵan bolatyn. Búgingi memorandým osy jobany ári qaraı júzege asyrýdy kózdeıdi.
Qazir jumys istep turǵan jylyjaılardan alynatyn ónim qyzylordalyqtardyń suranysynyń nebári 1,5 paıyzyn ǵana qamtamasyz etedi. Sondyqtan óńirde jylyjaı sharýashylyǵyn damytýdyń mańyzy zor.
Osy rette, qurmetti Fatıh Býdan myrza, «Fabe Agro» kompanııasynyń tájirıbesin eskere otyryp, Qyzylorda oblysynda jylyjaı keshenderin salý baǵytynda birlesip jumys isteýge daıynbyz.
Biz árbir ınvestorǵa qoldanystaǵy zańnama aıasynda jer telimin berýge, damý ınstıtýttarynan qarjylaı qoldaý alý kezinde qujattaryn rásimdeýge jan-jaqty kómek kórsetýge ázirmiz, — dedi Murat Nálqojauly.
Sol jaǵalaýdaǵy kólemi 250 gektar iri agroónerkásiptik jobanyń jalpy quny 134,5 mlrd teńge, onyń aıasynda 250 jańa jumys ornyn ashý josparlanǵan. Keshenniń óndiristik qýattylyǵy jylyna 45 myń tonna qyzanaq óndirýge múmkindik beredi.
Aıta keteıik, búginde óńirde aýmaǵy 12,1 gektar bolatyn 21 jylyjaı, olardyń qatarynda «KazAgroMır» JShS-niń ıspandyq zamanaýı tehnologııamen jabdyqtalǵan, tolyq avtomattandyrylǵan 2 gektarlyq jylyjaı kesheni bar.
